Azərbaycan, Bakı, 22 aprel / Trend , müxbir K.Zərbalıyeva/ "Azadlıq" qəzetinin bıçaqlanan jurnalistinin vəkilinin Baş Prokurorluğun müstəntiqinə qarşı iddiası təmin olunmayıb.
Bakının Nəsimi rayon məhkəməsində çərşənbə axşamı keçirilmiş prosesdə vəkil Elçin Sadıqovun Ağır Cinayətlərə Dair İşlər üzrə İstintaq İdarəsinin müstəntiqi Əli Quliyevin cəzalandırılması və ona dəyən mənəvi ziyanın ödənilməsi ilə bağlı tələbləri təmin olunmayıb. Sadıqov müstəntiq Quliyev barəsində xüsusi qərar qəbul edilməsini də məhkəmədən tələb edib.
Aqil Xəlilin vəkili Sadıqov vəkil hüquqlarının, azadlıq və toxunulmazlıq, habelə ədalətli məhkəmə araşdırması hüquqlarının pozulduğunu iddia edir və Baş Prokurorluğun Ağır Cinayətlərə Dair İşlər üzrə İstintaq İdarəsinin müstəntiqi Quliyevin cəzalandırılmasını və vəkilə dəyən ziyanın ödənilməsini tələb edir.
Vəkil bildirib ki, məhkəmənin qərarından apellyasiya şikayəti verəcək.
Sadıqov hüquqlarını müdafiə etdiyi Xəlilin aprelin 4-də Baş Prokurorluğun Ağır Cinayətlərə Dair İşlər üzrə İstintaq İdarəsində dindirilərkən vəkil hüquqlarını gerçəkləşdirməyə imkan verilməməsindən, 12 saatdan artıq qapalı şəraitdə saxlanılmasından, müstəntiq Quliyevin onun İstintaq İdarəsinin binasını tərk etməyə imkan verməməsindən narazı qalıb. Prokurorluqda olduğu 12 saat ərzində vəkilə harda olması barədə yaxınlarına məlumat verməyə də şərait yaradılmayıb.
12 saat prokurorluqda saxlanılmasını qanunsuz, əsassız və həbsə bərabər hesab edən Sadıqov iddia edir ki, müstəntiq ona münasibətdə Konstitusiyanın, Cinayət-Prossesual Məcəllənin, İnsan hüquqlarının və əsas azadlıqların müdafiəsi haqqında Avropa Konvensiyasının 5-ci (azadlıq və şəxsi toxunulmazlıq hüququ) və 6-cı (ədalətli məhkəmə araşdırması hüququ) maddələrinin ciddi pozuntusuna yol verib.
Məqalənin müəllifi ilə [email protected] ünvanı ilə əlaqə saxlaya bilərsiniz
