Azərbaycan, Bakı,02may/ Trend , müxbir C.Babayeva/ Ümumdünya Azərbaycan Gənclər Konqresinin (ÜAGK) 30 nəfərlik nümayəndə heyəti Sabir Rüstəmxanlının sədrlik etdiyi Dünya Azərbaycanlıları Konqresinin Kölndə keçiriləcək qurultayında iştirak edəcək. Bu barədə cümə günü Trend -a ÜAGK-nin həmtəsisçisi Rəşad Xasayoğlu məlumat verib.
DAK daxilində yaranmış narazılıqlar nəticəsində İdarə Heyəti (İH) iki yerə bölünüb. İH-nin 16 nəfər üzvündən 11-i Sabir Rüstəmxanlını DAK-ın sədri seçib və mayın 24-25-də Almaniyanın Köln şəhərində növbədənkənar qurultay keçirməyə hazırlaşırlar. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyir və iyunun 20-22-də Brüsseldə qurultay keçirəcəklər.
İsveçin vergi orqanları aprelin 23- də DAK-ın qeydiyyat sənədlərini Sabir Rüstəmxanlının adına rəsmiləşdirib.
Xasayoğlunun sözlərinə görə, ÜAGK Sabir Rüstəmxanlının sədrlik etdiyi DAK-la əməkdaşlıq etmək niyyətindədir.
"Bütün rəsmi sənədlər Rüstəmxanlının DAK sədri olduğunu göstərir", deyə Xasayoğlu bildirib.
Xasayoğlunun bildirdiyinə görə, DAK-ın Köln şəhərinin "Ramada" otelində keçiriləcək qurultayı Türkiyə və Avropanın televiziya kanalları ilə canlı yayımlanacaq.
