Azərbaycan, Bakı, 05 may / Trend , müxbir K.Zərbalıyeva/ Media Hüququ İnstitutu (MHİ) Azərbaycanda medianın hüququ durumu ilə bağlı növbəti aylıq hesabatını açıqlayıb. Hesabata görə, aprel ayı 2008-ci ilin əvvəlki ayları ilə müqayisədə tənqidçi mövqeyi ilə seçilən media nümunələrinə, nümayəndələrinə qarşı təzyiq və təhdidlər, məhkəmə iddialarının sayı artıb. Medianın bilgi əldə etməklə bağlı problemləri həll edilməyib, tənqidçi mövqeyinə görə həbs olunmuş jurnalistlərə qarşı hüquqi pozuntular silsiləsi davam edib.
Hesabatda bildirilir ki, apreldə "Azadlıq" qəzetinin əməkdaşı Fikrət Hüseynli, "Yeni Müsavat" qəzetinin rəhbərliyi, əməkdaşları, "Bizim yol" qəzetinin əməkdaşı Natiq Ədilov jurnalist fəaliyyətinə görə ölümlə hədələnib. Hökumətə qarşı sərt tənqidi mövqeyinə görə fəaliyyətini dayandırmağa məcbur olmuş "Gündəlik Azərbaycan" qəzetinin redaktoru, tanınmış hərbi jurnalist Üzeyir Cəfərovun avtomobili yandırılıb, "Azadlıq" qəzetinin iki dəfə fiziki basqıya məruz qalmış əməkdaşı Aqil Xəlil yenidən təhdid olunub, naməlum şəxslər tərəfindən izlənilib.
Hesabatda bildirilir ki, Yasamal və Səbail rayon məhkəmələrində əsasən məmurlar tərəfindən mediaya qarşı 4 mülki iddia qaldırılıb, 1 xüsusi ittiham qaydasında şikayət verilib, mənəvi zərər əvəzi olaraq mediadan 200 min AZN ödənc istənilib. Müdafiə Nazirliyinin Mənzil İstismar Xidməti Bölüyündən Fərdi Mürsəlov "Gündəlik Bakı" qəzetinin üzərinə 50 min AZN, iş adamı Eldar Məmmədəliyev "Təhqiqat" qəzetinin üzərinə 10 min AZN, Azərbaycan Nəşriyyatı nümayəndəsi İlham Sadıqov "Azadlıq" qəzetinin və yazarı Elmira Tofiqqızının hər birinin üzərinə 20 min AZN, "Elçi" qəzetinin baş redaktoru Əli Həziquliyev isə jurnalist Fikrət Fərəməzoğlunun üzərinə 100 min AZN məbləğində ödənc qoyulmasını məhkəmədən tələb edib. Əli Həziquliyev həmçinin Fərəməzoğlunun Cinayət Məcəlləsinin böhtan və təhqir maddələri ilə cinayət məsuliyyətinə cəlb edilməsi üçün xüsusi ittiham qaydasında məhkəməyə müraciət edib.
Aşağı məhkəmə instansiyalarının jurnalistlər barəsində çıxardığı qərar və hökmlərindən verilən şikayətlər təmin olunmayıb, jurnalistlərin qaldırdıqları iddialar rədd edilib. Hesabata görə, Yasamal məhkəməsi "Müxalifət" qəzetinin əməkdaşı Yaşar Ağazadənin Bakı Dövlət Universitetinin rektoruna, "Bizim yol" qəzetinin informasiya ala bilmədiyindən məhkəməyə üz tutmuş əməkdaşı Natiq Ədilovun BDU və Tələbə Qəbulu Üzrə Dövlət Komissiyasına qarşı iddialarını təmin etməyib. "Azadlıq" radiosunun müxbiri Məlahət Nəsibovanın Naxçıvan şəhər Polisinə qarşı şikayəti üzrə aşağı məhkəmənin qərarından, "Kriminal Aləm" qəzetinin qarayaxma ittihamı ilə şərti azadlıqdan məhrum edilmiş baş redaktoru Mehralı İsgəndərovun Yasamal məhkəməsinin hökmündən, Ağır Cinayətlərə Dair İşlər üzrə Məhkəmənin "Bizim yol" qəzetinin əməkdaşı Müşfiq Hüseynovu 6 il azadlıqdan, 2 il jurnalist fəaliyyəti ilə məşğul olmaqdan məhrum edən hökmündən verilən şikayətləri Bakı şəhər Apellyasiya Məhkəməsi təmin etməyib.
Apreldə mediya qarşı bir iddia rədd edilib. Binəqədi rayon məhkəməsi Fyodor Məhərrəmovun "Sənət qəzeti"nin yazarı Rasət Pirisoya qarşı mülki iddiasını əsassız sayıb.
Müəlliflə əlaqə saxlamaq üçün elektron ünvan - [email protected]
