Azərbaycan,Bakı,29 may / Trend , müxbir K.Zərbalıyeva/ Konstitusiya Məhkəməsi Mülki Məcəllənin 228.5-ci maddəsinin izahı ilə bağlı Ombudsmanın sorğusuna və Sumqayıt Apellyasiya Məhkəməsinin müraciətinə baxıb.
Hər iki qurum Mülki Məcəllənin 228.5-ci maddəsin də nəzərdə tutulan mülkiyyətçinin razılığının nədən ibarət olmasını aydınlaşdırmağı Konstitusiya Məhkəməsindən xahiş edib.
Konstitusiya Məhkəməsindən Trend -a verilən məlumata görə, məhkəmənin qərarı ilə həmin maddədə nəzərdə tutulmuş mülkiyyətçinin razılığı dedikdə, Mülki Məcəllənin 228.2-ci maddəsi ilə müəyyən edilmiş notarial qaydada təsdiq edilmiş müqavilə nəzərdə tutulur.
MM-in 228.2-ci maddəsində qeyd olunur ki, yaşayış binasının tərkib hissəsindən istifadə hüququnun əmələ gəlməsi, həyata keçirilməsi şərtləri və xitamı mülkiyyətçi ilə bağlanan, notariat qaydasında təsdiqlənən yazılı razılaşma ilə müəyyənləşdirilir.
Təcrübədə heç vaxt mülkiyyətçi ilə ailə üzvləri və ya mənzilin digər istifadəçiləri arasında nəinki notariat qaydasında təsdiqlənmiş, heç sadə yazılı formada belə razılaşma qaydasına da əməl olunmur.Adətən, bu cür münasibətlərin ilkin yaranma vaxtında yaşayış sahəsinin istifadəçiləri (ailə üzvləri və digər şəxslər) mülkiyyətçinin razılığı ilə mənzilə köçürülür və mənzildən istifadə edirlər. Mənzil istifadəçisi ilə digər ailə üzvü və ya mülkiyyətçi arasında nikah-ailə mübahisələri yarandıqda, ailə münasibətlərinə xitam verildikdə isə, mübahisə yaranır.
Bu zaman yaşayış sahəsinin mülkiyyətçisinin digər ailə üzvünün yaşamasına və mənzildən istifadə hüququna notariat qaydasında təsdiq edilmiş yazılı razılığı olmadığı meydana çıxır.
Bu problemi həll etmək məqsədilə 2005-ci ilin noyabrında MM-ə 228.5-ci maddə əlavə edilib.
MM-in 228.5-ci maddəsində bildirilir ki, yaşayış binasının tərkib hissəsinin mülkiyyətçisinin, onunla birgə yaşayan ailə üzvlərinin (ər,arvad, uşaq) yaşayış sahəsindən onunla birgə istifadə etmək hüququ var.
Həmin mənzilə mülkiyyətçinin ailə üzvlərinin yetkinlik yaşına çatmayan uşaqlarını köçürməyə ixtiyarı var. Digər üzvlərin (ər, arvad) köçürülməsinə yalnız mülkiyyətçinin razılığı ilə yol verilir.
Burada notariat qaydasında təsdiqlənmə, yazılı razılıq tələbinin qeyd olunmaması mübahisə doğurduğundan, Sumqayıt Apellyasiya Məhkəməsi həmin maddənin izahı ilə bağlı KM-yə müraciət edib.
Konstitusiya Məıhkəməsi qərarında qeyd edib ki, 228.5-ci maddə ayrı tətbiq oluna bilməz və 228.2-ci maddə 1 sentyabr 2000-ci ildən qüvvədə olduğu üçün, həmin maddə də eyni vaxtdan tətbiq olunmalıdır.
Müəlliflə əlaqə saxlamaq üçün elektron ünvan - [email protected]