Azərbaycan,Bakı,03 İyun / Trend , müxbir K.Zərbalıyeva/ Azərbaycan vətəndaşları daha çox məhkəmələrin, hüquq-mühafizə orqanlarının və icra strukturlarının ərizə və şikayətlərə baxılması ilə bağlı fəaliyyətindən narazıdır.
Bu barədə çərşənbə axşamı keçirilən mətbuat konfransında Azərbaycanda İnsan Hüquqlarına Dair Beynəlxalq Standartların Təsbiti üzrə Birgə işçi Qrupunun sədri Kamil Səlimov məlumat verib.
Onun sözlərinə görə, İşçi Qrupunda fəaliyyət göstərən "Qaynar Xətt"ə daxil olan şikayətlərin böyük əksəriyyəti bu qəbildəndir.
Şikayətlərin əksəriyyət təşkil etdiyi sahələrdə monitorinq aparılmasına icazə verilməsi üçün dövlət qurumlarına müraciət edildiyini deyən Səlimov bildirib ki, həmin problemlərin həlli üçün İşçi Qrup təkliflər hazırlayıb.
İşçi Qrup mülki hüquq mübahisələrinə məhkəmələrdə baxılarkən müdafiənin təşkili və bu fəaliyyətə tələbələrin cəlb edilməsi, hakimlərin iş yükünün azaldıması üçün təxirəsalınmaz tədbirlərin görülməsini təklif edib.
Səlimovun sözlərinə görə, məhkəmələrdə baxılan mülki işlərin böyük əksəriyyəti ailə- nigah münasibətləri ilə bağlıdır. "Boşanma zamanı əmlakın bölüşdürülməsi, uşaqların himayəyə verilməsi və s. məsələlərlə bağlı şikayətlər çoxdur. Lakin qanunvericilikdə bu mübahisələri nizamlamaq üçün müddəa var. Nigahdan öncə tərəflərin nigah müqaviləsi bağlaması nəzərdə tutulur",- deyə İşçi Qarupunun rəhbəri bildirib.
Səlimov hesab edir ki, vətəndaşlar nigahdan öncə nigah müqaviləsi bağlayarsa, məhkəmələrdə belə işlərin sayı 60 faiz azalar.
Müəlliflə əlaqə saxlamaq üçün elektron ünvan - [email protected]