Azərbaycan, Bakı, 18 iyun/ Trend , müxbir C.Babayeva/ Yeni tədris ilindən Azərbaycanın yeddi orta məktəbində ingilis dilinin tədrisi ilə bağlı Böyük Britaniyanın "British Councıl" təşkilatı ilə birgə pilot layihə həyata keçiriləcək. Təhsil Nazirliyinin məlumatına əsasən, bu barədə təhsil naziri Misir Mərdanov təşkilatın Azərbaycan üzrə direktoru Nikol de Lalüvye ilə çərşənbə günü keçirdiyi görüşdə bildirib.
Nazirin sözlərinə görə, pilot layihə çərçivəsində, yeddi məktəb üçün xüsusi tədris planı təsdiq ediləcək, ingilis dilinin tədrisinə ayrılan vaxt artırılacaq və burada müvafiq fənni tədris edən müəllimlər treninqlərə cəlb olunacaq. "Layihə uğurlu olarsa, bu iş davam etdiriləcək. Ingilis dili dərsliklərinin və dərs komplektlərinin hazırlanması işinə "British Council" təşkilatı tərəfindən dəstək göstərilməsi məqsədəuyğundur", - deyə nazir bildirib.
Lalüvye "British Councıl" təşkilatının Azərbaycanda ingilis dilinin tədrisi və təkmilləşdirilməsi üzrə aparılan layihələrə lazımi köməklik göstərməyə hazır olduğunu qeyd edib.
O, bu ilin payızında Böyük Britaniyanın texniki-peşə təhsili sahəsi üzrə mütəxəssislərin Bakıya səfərinin nəzərdə tutulduğunu da bildirib.
Trend -un arayışı: Böyük Britaniyanın "British Council" təşkilatı Azərbaycanda 15 ildir ki, fəaliyyət göstərir. Bü dövr ərzində təşkilat Azərbaycanda təhsillə bağlı 15 layihə həyata keçirir və bu layihələr bü gün də davam etdirilir. Layihələr çərçivəsində, 1300-dən çox ingilis dili müəllimi müxtəlif treninqlər keçib, 120-dən çox təhsil işçisi Böyük Britaniyaya səfər edib. 52 min Azərbaycan məktəblisi və tələbəsi "British Council" təşkilatının layihələrində iştirak edib.
Məqalə müəllifi ilə əlaqə saxlamaq üçün ünvan - [email protected]