Fransa, Strasburq, 26 iyun / Trend , müxbir A. Məhərrəmli/Azərbaycanın Konstitusiya Məhkəməsinin 10 illik yubileyi münasibətilə Avropa Şurasının Venesiya Komissiyası və Azərbaycan Konstitusiya Məhkəməsinin birgə təşkilatçılığı ilə cari ilin 14-15 iyul tarixlərində Bakıda "Konstitusiya məhkəməsinin qərarlarının icra edilməsi konstitusional ədalətin həyata keçirilməsi prosesinin ana xətti kimi" mövzusunda beynəlxalq konfrans keçiriləcək. Bu haqda Trend -a açıqlamasında Venesiya Komissiyasının katibi Canni Bukikio eksklüziv açıqlamasında məlumat verib. Sözügedən konfransda Azərbaycanın və Avropa təsisatlarının rəsmiləri istirak edəcək.
Konfransda Konstitusiya Məhkəməsinin sədri Fərhad Abdullayev, Prezidentin Icra Aparatının rəhbəri Ramiz Mehdiyev, Milli Məclis sədri spikeri Oqtay Əsədov, Avropa Insan Hüquqları Məhkəməsində Azərbaycanın hakimi Xanlar Hacıyev, Avropa Şurası Venesiya Kommisiyasının katibi Canni Bukikio və GTZ Alman Texniki Əməkdaşlıq layihəsinin (Azərbaycanda hüquqi və məhkəmə islahatlarına dəstək layihəsi) rəhbəri Tomas Herman çıxıs edəcəklər.
Bundan əlavə konfransda Rusiya Federasiyasının, Türkiyənin, Qazaxistanın, Belarusun, Latviyanın, Moldovanın, Macarıstanın, Çexiyanın, Israilin, Almaniyanın, Litvanın və Ruminyanın Konstitusiya Məhkəmələrinin sədrlərini və ya məsul şəxslərini müxtəlif mövzularda cıxışı gözlənilir.
