Azərbaycan, Bakı, 10 iyul / Trend , muxbir K.Zərbalıyeva/ Azadlıq Hərəkatçıları Birliyinin "Azadlıq" qəzetinə qarşı iddiası üzrə hazırlıq iclası keçirilib.
Birlik qəzetin Azərbaycan Xalq Cəbhəsinin (AXC) təsisçiliyindən çıxarılaraq kollektivin təsisçiliyinə verilməsinin qeyri-qanuni hesab olunması, "Azadlıq" qəzetinin indiki rəhbərlik və kollektivlə istehsalına və yayımına xitam verilməsini tələb edir. İddiada qeyd olunur ki, "Azadlıq" qəzeti AXCP-nin orqanı kimi deyil, qəzet kollektivinin orqanı kimi fəaliyyət göstərir.
İddiaçı "Azadlıq" qəzetinin indiki rəhbərinin AXC qurucuları və həmin qəzetin təsisçilərinə vurduğu mənəvi zərərə görə, mətbuat vasitəsilə üzr istənilməsini, AXC qurucularına, cəmiyyətə vurulan mənəvi zərərə görə isə, 150 min manat məbləğində kompensasiya ödənilməsi tələb olunur.
Bakının Yasamal rayon məhkəməsində cümə axşamı keçirilən iclasda cavabdehin nümayəndələri Azər Əhmədov və Elçin Sadıqlı iddianın, əsassız olduğu üçün, baxılmamış saxlanılmasını məhkəmədən xahiş ediblər.
İddiaçının nümayəndələri Təhmasib Novruzovun əvvəllər "Azadlıq" qəzetinin təsisçilərindən biri olduğunu əsas gətirərək, onun qəzetdən təsisçi payını istədiyini vurğulayıblar.
Cavabdehin nümayəndələri Novruzovun heç vaxt qəzetin təsisçisi olmadığını bildiriblər. İddiaçının nümayəndələri Novruzovun qəzetin təsisçisi olması barədə məhkəməyə sənəd təqdim edə bilməyib.
Hazırlıq iclasında məhkəmə baxışının iyulun 25-də keçirilməsi qərara alınıb.
"Azadlıq" qəzeti 1989-cu ildə Azərbaycan Xalq Cəbhəsinin orqanı kimi yaradılıb. 1993 -cü ildə redaksiya kollektivi də təsisçi olub. Xalq Cəbhəsi partiyaya çevriləndən bir neçə il sonra, qurum qəzetin təsisçiliyindən imtina edib. Bundan sonra qəzetə redaksiya kollektivi təsisçilik edib.
Azadlıq Hərəkatçıları Birliyi 2006 -cı ilin yanvarında təsis edilib.
Müəlliflə əlaqə saxlamaq üçün elektron ünvan - [email protected]
