Azərbaycan, Bakı, 15 iyul/ Trend , müxbir E.Babayev/ İsveç parlamentariləri Azərbaycan həqiqətlərini öz gözlərilə görmək və ermənilərin Azərbaycan türklərinə qarşı soyqırım aktı törətdiyinin şahidi olmaq üçün, Quba şəhərinə səfərə dəvət ediliblər. Bu barədə çərşənbə axşamı Trend -a Dünya Azərbaycanlıları Konqresinin mətbuat xidmətindən (DAK) məlumat verilib.
Trend -un arayışı: DAK-ın həmsədri Firidun Pərvizniya İsveç Krallığında səfərdədir. Səfərdə məqsəd İsveçin rəsmi dövlət orqanlarını, hökumət nümayəndələrini, parlamentin üzvlərini və yerli ictimaiyyəti Azərbaycan həqiqətləri ilə bağlı məlumatlandırmaqdır. DAK həmsədri İsveç Krallığında onlarla diaspor təşkilatını özündə birləşdirən Azərbaycan Federasiyası İsveç (AFİ) qurumunda görüş keçirib. Bundan əlavə, İsveç Krallığında fəaliyyət göstərən Azərbaycan evlərində, mədəniyyət mərkəzlərində də görüşlər olub.
DAK- dan bildirilib ki, çərşənbə axşamı DAK həmsədri İsveç parlamentinin üzvləri ilə görüşüb. Parlamentin ayrı - ayrı deputatları ilə təkbətək görüşlər də keçirilib. Görüşlərdə Dağlıq Qarabağ problemi, XX əsrin ən dəhşətli soyqırım aktlarından biri olan Xocalı faciəsi, Qubada yenicə aşkarlanmış soyqırım məzarlığı, Azərbaycanın parçalanması, Azərbaycanın Güneyində milli- azadlıq mübarizəsi, İranda yaşayan 35 milyondan artıq Azərbaycan türkünün bütün hüquqlarının kobud surətdə pozulması və s. məsələlər barədə qonaqlara ətraflı məlumat verilib. DAK həmsədri parlamentin üzvlərindən Dağlıq Qarabağ probleminə, XX əsrin ən dəhşətli soyqırım aktlarından biri olan Xocalı faciəsinə və İran adlanan coğrafi ərazidə öz tarixi torpaqlarında yaşayan 35 milyondan artıq Azərbaycan türkünün bütün hüquqlarının kobud surətdə pozulması məsələlərinə biganə qalmamağı xahiş edib. O, İsveç parlamentarilərini Azərbaycan həqiqətlərini öz gözlərilə görmək və ermənilərin Azərbaycan türklərinə qarşı soyqırım aktı törətdiyinin şahidi olmaq üçün səfərə dəvət edib.
DAK 1997- ci ildə ABŞ - da yaradılıb. Təşkilat, əsasən, Güney Azərbaycanın istiqlaliyyəti uğrunda mübarizə aparır. DAK daxilində yaranmış narazılıqlar nəticəsində, İdarə Heyəti (İH) iki yerə bölünüb. İH-nin 16 nəfər üzvündən 11-i Sabir Rüstəmxanlını DAK-ın sədri seçib. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyirlər.
İyunun 6 - 8 - də Almaniyanın Köln şəhərində keçirilmiş Sabir Rüstəmxanlının sədrlik etdiyi DAK-ın qurultayında 25 ölkədən 300 - dək nümayəndə və qonaq iştirak edib. Qurultayda DAK-ın Nizamnaməsi və Məramnamsəinə dəyişikliklər qəbul olunub. DAK- da həmsədrlik institutu yaradılıb, Sabir Rüstəmxanlı və Firidin Pərvizniya DAK-ın həmsədrləri seçilib. Qulamrza Səbri Təbrizi Köln qurultayını qeyri-legitim hesab edib. İyunun 11- də Köln qurultayının yekunlarına həsr olunmuş mətbuat konfransında Rüstəmxanlı bəyan edib ki, bundan sonra Dünya Azərbaycanlıları Konqresi adına iddialılar məhkəmə qarşısında cavab verəcəklər.
Təbrizinin sədrlik etdiyi DAK-ın iyunun 21-23 - də Brüsseldə Avropa Parlamentində keçirdiyi qurultayında təşkilatın Nizamnaməsinə dəyişklik edilib. Dəyişikliyə əsasən, Quzey Azərbaycandan Paşa Qəlbinur, Güney Azərbaycandan isə, DDAK sədri Məmmədrza Xəşti DAK-ın həmsədri, Təbrizi isə, DAK-ın fəxri sədri seçilib.
Məqalə müəllifi ilə əlaqə ünvanı: [email protected]
