Azərbaycan, Bakı, 05 dekabr / Trend , müxbir İ.Əlizadə/ Bütün Qafqazın dini lideri Şeyxulislam Hacı Allahşükür Paşazadə dünya müsəlmanlarını Eydül-Əzha (Qurban bayramı) münasibəti ilə təbrik edib. "Hamınızı səmimi qəlbdən təbrik edir, bu əziz gündə Allahın mərhəmətinin üzərinizdə bərqərar olması üçün dualar edirəm", bu barədə Qafqaz Müsəlmanları İdarəsinin sədri Şeyxulislam Allahşükür Paşazadənin cümə günü yaydığı təbrikində bildirilib.
Şeyxulislam qeyd edib ki, bu əziz gündə bütün duaları Azərbaycanın xoşbəxt gələcəyi, xalqımızın rifah və səadəti üçündür.
"Bizim ən böyük arzumuz ondan ibarətdir ki, xalqımız dövlət başçısı İlham Əliyevin rəhbərliyi ilə ən ümdə arzularına, ülvi istəklərinə nail olsun, doğma Qarabağa qovuşsun", - deyə təbrikdə bildirilib.
Paşazadə Qurban bayramında Allahdan Azərbaycana sülh, sabitlik, xeyir və bərəkət arzulayıb.
Məqalə müəllifi ilə əlaqə saxlamaq üçün ünvan: [email protected]