Azərbaycan, Bakı, 26 dekabr / Trend , müxbir C.Babayeva/ Azərbaycanın 10 yaşı tamam olan müstəqil "Üç nöqtə" qəzeti 2009-cu ildə yeni layihə həyata keçirəcək.
"Maddi çətinliklər və mətbuatın bugünkü vəziyyəti layihələrimizi bu il reallaşdırmağa imkan vermədi. 2008-ci il üçün nəzərdə tutulan layihə 2009-cu ilə qədər taxirə salınıb. Ümid edirik ki, dünyada baş vermiş maliyyə böhranı gələn il mətbuata və "Üç nöqtə"yə təsir etməyəcək və qarşıya qoyduğumuz layihəni 2009-cu ildə həyata keçirə biləcəyik", deyə qəzetin baş redaktoru və təsisçisi Xoşqədəm Baxşəliyeva cümə günü Trend -a deyib.
"Üç nöqtə" qəzeti 1998-ci ilin dekabrından nəşr olunur. Qəzet bu il 10 illik yubileyini qeyd edir.
Baş redaktor "Üç nöqtə" qəzetini növbəti 10 illər gözlədiyini deyib. " Mətbuatın bugünkü vəziyyəti iqtisadi baxımdan o qədər də ürəkaçan deyil. İnanıram ki, gələcək illərdə iqtisadi çətinliklərin mətbuata təsirini görməyəcəyik", Baxşəliyeva bildirib.
Məqalə müəllifi ilə əlaqə ünvanı: [email protected]