Azərbaycan, Bakı 26 dekabr / Trend , müxbir K. Zərbalıyeva/ Azərbaycan Məhkəməsi dövlətə xəyanətdə təqsirli bilinərək məhkum olunmuş baş redaktor barəsində məhkəmə hökmünü qüvvədə saxlayıb.
Cümə günü Bakı Apellyasiya Məhkəməsində Milli Elmlər Akademiyası Dilçilik İnstitutunun sabiq bölmə müdiri, "Tolişi sədo" qəzetinin baş redaktoru Novruzəli Məmmədov və bölmənin sabiq əməkdaşı Elman Quliyevin apellyasiya şikayəti üzrə proses yekunlaşıb.
Məmmədovun vəkili Ramiz Məmmədov Trend -a bildirib ki, bu gün keçirilən iclasda dövlət ittihamçısı çıxış edərək, məhkəmə hökmünün qüvvədə saxlanılmasını və apellyasiya şikayətinin təmin olunmamasını məhkəmədən xahiş edib.
Məhkəmə apellyasiya şikayətinin təmin olunmaması və Ağır Cinayətlərə Dair İşlər Üzrə Məhkəmənin hökmünün qüvvədə saxlanılması barədə qərar qəbul edib.
Vəkil apellyasiya şikayətindən Ali Məhkəməyə kassasiya şikayəti veriləcəyini deyib.
Məmmədov bildirib ki, Ali Məhkəmə də işə obyektiv baxmazsa, Avropa İnsan haqları Məhkəməsinə müraciət edəcəklər.
Apellyasiya şikayətində Məmmədov barəsində bəraət hökmünün çıxarılması tələb olunurdu.
Milli Elmlər Akademiyası Dilçilik İnstitutunun bölmə müdiri və baş redaktor Novruzəli Məmmədov və qəzetin məsul katibi Elman Quliyev 2007-ci ilin fevralında həbs olunublar.
Məhkəmənin hökmü ilə Məmmədov 10 il, Quliyev isə, 6 il müddətinə azadlıqdan məhrum ediliblər. Onlar Cinayət Məcəlləsinin dövlətə xəyanət (274) və milli, irqi, dini düşmənçiliyi yayma (283) maddələri ilə ittiham olunublar.
Məqalə müəllifi ilə əlaqə ünvanı:[email protected]
