Azərbaycan, Bakı, 14 iyul / Trend , müxbir H.Bağırov /
Azərbaycan məhkəməsi uşaq oğurluğunda ittiham olunan həkimlərin kassasiya şikayətinə baxıb.
Ali Məhkəmədən Trend -a verilən məlumata görə, 3 saylı Sabunçu rayon Kliniki Xəstəxanasının həkimi Lalə Haqverdiyevanın, həmin xəstəxananın tibb bacısı Səkinə Nadirova və Cəbrayıl rayonundan məcburi köçkün olan Vəfa İsmayılovanın barəsində Bakı Apellyasiya Məhkəməsinin çıxardığı qərar dəyişdirilib.
Ali Məhkəmənin qərarı ilə təqsirləndirilən şəxslərin əməlləri Cinayət Məcəlləsinin 144-1.2-ci (insan alveri) madəsinə tövsif edilərək, hər biri 1 il müddətinə azadlıqdan məhrumetmə cəzasına məhkum ediliblər.
Adıçəkilən şəxslər Cinayət Məcəlləsinin adam oğurluğu (144.1-ci,144.2.6-cı) maddəsi ilə ittiham olunublar.
Bakı şəhər sakini Gültəkin Həsənova vaxtından bir ay əvvəl doğuş edib. Həkimlər ona uşağının ölü doğulduğunu bildiriblər və uşağı Vəfa İsmayılovanın sifarişi ilə ona satmaq istəyiblər.
Həsənova uşağının oğurlanmasından şübhələnərək, hüquq-mühafizə orqanlarına şikayət edib. Onun şikayəti əsasında həkimlər həbs edilib.
Aparılan istintaq zamanı müəyyən edilib ki, uşağı həkimlərdən alan Vəfa İsmayılovanın həmin uşağı xarici vətəndaşlardan birinə 10 min dollara satmaq niyyəti olub. Bu faktı müəyyən edən hüquq-mühafizə orqanlarının əməkdaşları Vəfa İsmayılovanı da həbs ediblər.
Ağır Cinayətlərə Dair İşlər üzrə Məhkəmənin hökmü ilə təqsirləndirilən şəxslərin hər birinə 3 il müddətinə azadlıqdan məhrumetmə cəzası təyin edilib. Hökmdən verilən apellyasiya şikayətinə baxış zamanı Bakı Apellyasiya Məhkəməsi Lalə Haqverdiyeva ilə Səkinə Nadirovanın cəzasını 1 il azaldıb və onlara 2 il cəza təyin ediblər. Hökmün digər hissəsi isə qüvvəsində saxlanılıb.