Azərbaycan, Bakı, 24 avqust / Trend , muxbir H.Bağırov /
Siyəzən rayon sakini nişanlısından ayrılmamaq üçün metro stansiyasına bomba qoyulması barədə yalan məlumat verdiyini deyib.
Trend -un məlumatına görə, bu gün Ağır Cinayətlərə Dair İşlər üzrə Məhkəmədə Siyəzən rayon sakini Pərvin Ağasiyevanın işi üzrə keçirilən prosesdə təqsirləndirilən ifadə verib və bildirib ki, atası nişanlı olduğu oğlanın cinayət törətdiyi üçün ondan ayrılmasını tələb edib.
"Atam mənim cinayəti törədən oğlana ərə getməyimə razı olmurdu. Mən isə atamın belə hərəkətinə dözə bilmirdim", - deyə Ağasiyeva bildirib.
Elan olunmuş ittiham üzrə özünü təqsirli bilən Ağasiyeva deyib ki, nişanlısının atasıgildə qonaq olduğu zaman polisə zəng edib və "28 May" metro stansiyasına bomba qoyulması barədə məlumat verib.
Məhkəmə prosesində şahid kimi dindirilən Ağasiyevanın atası Balakişi Ağasiyev bildirib ki, qızının cinayət törədən oğlana ərə getməsinə razı olmayıb və bu səbəbdən də onların ayrılmasını tələb edib.
22 yaşlı Ağasiyeva öz mobil telefonu ilə bu il iyunun 28-də Daxili İşlər Nazirliyinin 102 qaynar xəttinə zəng edərək "28 May" metro stansiyasına bomba qoyulnması barədə məlumat verib. Aparılan araşdırmalar zamanı məlumat təsdiqini tapmayıb və o, həmin gün saxlanılıb.
Ağasiyeva Cinayət Məcəlləsinin terrorçuluq barədə yalan məlumat vermə (216-cı) maddəsi ilə ittiham olunur.
Məqalə müəllifi ilə əlaqə unvanı: [email protected]
