Azərbaycan, Bakı, 13 noyabr / Trend , müxbir H.Bağırov/
Azərbaycanda qanunsuz silahlı birləşmənin tərkibində iştirak etməkdə təqsirli bilinən şəxs azadlığa buraxılıb.
Trend -un məlumatına görə, cümə günü Bakı Apelyasiya Məhkəməsində sabiq Baş nazir Surət Hüseynovun dəstəsində iştirak etməkdə təqsirli bilinən Əli Sabir oğlu Əbdürrəhmanovun apelyasiya şikayətinə baxılıb.
Məhkəmənin qərarı ilə Əbdürrəhmanovun barəsində təyin edilmiş 4 il azadlığın məhdudlaşdırılması cəzası ləğv edilib.
Məhkəmə qərara alıb ki, Əbdürrəhmanovun iştirak etdiyi silahlı birləşmənin törətdiyi cinayətlərdən üzun müddət keçib və buna görə də Əbdürrrəhmanovun barəsində başlanmış cinayət işinə xitam verilib.
Təqsirləndirilən şəxs Cinayət Məcəlləsinin qanunvericilikdə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silah-sursatla, hərbi texnika və ləvazimatlarla təmin etmə (279.1) maddəsi ilə təqsirləndirilib.
Əbdürrəhmanov sabiq Baş nazir Surət Hüseynovun Gəncə yaxınlığındakı Üçtəpə ərazisində yaratdığı silahlı birləşmənin üzvü olub. 1994-cü il oktyabrın 4-də Surət Hüseynov və digərlərinin hakimiyyəti ələ keçirmək üçün hazırladıqları sui-qəsddə iştirak edib.
Məqalə müəllifi ilə əlaqə ünvanı: [email protected]
