Azərbaycan, Bakı, 16 iyul /Trend, müxbir K.Zərbalıyeva/
Azərbaycan Konstitusiya Məhkəməsinə bir sıra qanunların normalarının şərh edilməsi ilə bağlı müraciətlər daxil olub.
Konstitusiya Məhkəməsindən cümə günü Trend-ə verilən məlumata görə, Ali Məhkəmə Mülki Məcəllənin 178.8-ci maddəsinin şərh olunması ilə bağlı bu məhkəməyə sorğu göndərib.
Mülki Məcəllənin 178.8-ci maddəsində qeyd olunur ki, mənzil, bağ, qaraj və ya başqa kooperativin üzvü, pay yığımına hüququ olan digər şəxslər kooperativin verdiyi mənzil, bağ, qaraj və ya ayrı qurğu üçün pay haqqını tam verdikdə həmin əmlaka mülkiyyət hüququ əldə edir.
Bakının Yasamal Rayon Məhkəməsi isə Mülki-Prosessual Məcəllənin 307.2.4-cü maddəsinin şərh olunmasını istəyir.
Həmin maddədə ər-arvaddan birinin vəfat etməsi nəticəsində müvafiq icra hakimiyyəti orqanında nikah qeydə alına bilməzsə, qanunla müəyyən edilmiş hallarda faktiki nikah münasibətlərində olma faktının müəyyən edilməsini nəzərdə tutur.
1 saylı Yerli İqtisad Məhkəməsi isə "Sosial sığorta haqqında" Qanunun 21-ci maddəsinin 5-ci hissəsinin şərh olunması ilə bağlı KM-yə müraciət edib.
Həmin hissədə qeyd olunur ki, mülkiyyətindən və təşkilati-hüquqi formasından asılı olmayaraq, Azərbaycan Respublikasının və ya xarici dövlətin qanunvericiliyinə uyğun olaraq yaradılmış hüquqi şəxs statusunda olan müəssisə, idarə və təşkilatların, onların filial və nümayəndəliklərinin işçilərinin sayının gizlədilməsinə görə (əmək müqaviləsi olmadan işləyənlər olduqda və ya müqaviləsi olduğu halda, hesabatdan gizlədildikdə) hər işçiyə görə - sığortaedənin fəaliyyət dövrünün hər ayı üçün əlli beş manat miqdarında maliyyə sanksiyaları tətbiq olunur.
KM-dən bildirilib ki, hazırda həmin sorğu və müraciətlər araşdırılır.
