Azərbaycan, Bakı, 7 sentyabr /Trend, müxbir M. Əliyev/
Yaponiya Səfirliyinin maliyyə dəstəyi ilə Azərbaycanın Şəki rayonunun Dərəcənnət kənd məktəbinin ikinci korpusu inşa edilərək şagirdlərin ixtiyarına verilib.
Adıçəkilən layihənin həyata keçirilməsi üçün Yaponiya Səfirliyi və "Qadın dünyası" Qeyri-Hökumət Təşkilatı arasında imzalanmış qrant müqaviləsinin ümumi məbləği 87,958 ABŞ dollarıdır. Layihənin əsas məqsədi yeni məktəb binası tikməklə Dərəcənnətdə yaşayan uşaq və gənclərin təhsilalma şəraitinin yaxşılaşdırılmasıdır. Bu barədəTrend-ə "Qadın dünyası" QHT-dən bildiriblər.
Məktəb tikintisi Yaponiya hökumətinin "Ot kökləri və insan təhlükəsizliyi qrant yardımı proqramı" çərçivəsində Azərbaycanda təhsilin inkişafı üçün həyata keçirilmiş artıq 62-ci layihədir. Bu günə qədər adıçəkilən yardım proqramı çərçivəsində ölkədə yeni məktəblərin tikintisi, mövcud məktəblərin yenidən qurulması və təhsil ləvazimatının yaxşılaşdırılması üçün artıq 4,885,530 ABŞ dolları məbləğində qrant yardımı ayrılıb.
