Azərbaycan, Bakı, 26 noyabr /Trend, müxbir M.Əliyev/
Azərbaycanın Gəncə şəhəri ətrafında aparılan arxeoloji qazıntılar şəhərin qədim tarixinə aid yeni faktlar üzə çıxarıb. Bunu Trend-ə cümə günü arxeoloji ekspedisiyanın rəhbəri Arif Məmmədov bildirib.
Onun sözlərinə görə, Gəncə ərazisində aparılan arxeoloji qazıntılar zamanı aşkar olunmuş bəzək əşyaları, küp və xeyli sayda saxsı qablar burada ən qədim insan məskəni olduğunu söyləməyə əsas verir. Məmmədov bildirib ki, aparılan arxeoloji qazıntılar zamanı qədim Gəncənin yerləşdiyi ərazi də aşkar edilib.
"Yazılı məlumatın olmaması həmin tarixdə şəhərin olmaması demək deyil", - o, deyib.
"Hazırda əlimizdə olan faktlar Gəncənin 2500 illik tarixə malik olduğunu deməyə əsas verir, lakin gələcək qazıntı işlərinin daha qədim tarixə nişanə verməsi istisna deyil", - Məmmədov bildirib.
O, həmçinin qeyd edib ki, son illər aparılan qazıntılar zamanı Gəncə ətrafında qala divarları aşkar edilib.
Gəncə paytaxt Bakıdan 365 km qərbdə yerləşir.
