Azərbaycan, Bakı, 17 yanvar /Trend, müxbir T.Hacıyev/
Azərbaycanda ərzaq və qeyri-ərzaq məhsullarının sterilizasiyası üçün laboratoriya yaradılacaq. Bu barədə bazar ertəsi Trend-ə Azərbaycan Milli Elmlər Akademiyasının (AMEA) Radiasiya Problemləri İnstitutunun direktoru Adil Qəribov bildirib.
Onun sözlərinə görə, rəhbərlik etdiyi institut Beynəlxalq Atom Enerjisi Agentliyi (BAEA) ilə birgə iki layihə icra edir - sterilizasiya qurğusu və tədqiqat nüvə reaktorunun əsaslandırılması.
"Gələn ildən təklif etmişik ki, yeni üç laboratoriya yaradılsın. Onlardan ikisini BAEA yaratmaq fikrindədir. Bunlar sterilizasiya qurğusu üçün dozemetriya və bioloji laboratoriyalardır. Artıq agentliyə təklif göndərilib və təsdiq haqqında məlumat var", - Qəribov əlavə edib.
O bildirib ki, sterilizasiya qurğusunun layihə-smeta işləri hazırlanır.
"Sterilizasiya qurğusu Hökməli qəsəbəsi tərəfdə tikiləcək və unikal bir qurğu olacaq. Respublikamız üçün çox mühüm bir obyekt olacaq. Burada biz külli miqdarda yemək, bitki, dərman vəsaitlərini, hətta tikinti materiallarını şüalanma yolu ilə sterilizasiya edəcəyik", - o bildirib.
Qəribov deyib ki, bu sterilizasiya qurğusu istənilən sahəyə tətbiq oluna bilər.
"Şüalandırmaq vasitəsilə kiçik dozada, keyfiyyət parametrlərinə təsir etmədən sterilizasiya aparılacaq. Xüsusi laboratoriyada onların keyfiyyət parametrləri tətbiq olunacaq", - o qeyd edib.
Qəribovun sözərinə görə, dünyada bütün qida maddələri üçün beynəlxalq standartlar tətbiq olunur.
"Biz respublikada həmin standartların dəqiqləşməsi ilə məşğul olacağıq. Indi dünyada, Avropa ölkələrində ərzaq məhsullarının sterilizasiyası üzrə sənədləşmə var. Çox güman ki, yaxın gələcəkdə bütün dünyada bu konvensiya məcburi olacaq. Çünki haradasa bir xəstəlik ocağı yaranan kimi bütün dünyaya yayılır və minlərlə insanlar məhv olur. Bizim ölkə şərqlə qərb arasında keçid ölkə olduğuna görə, güman edirəm ki, bizdə də bu məsələ yaxın vaxtlarda həllini tapacaq", - vurğulayıb.