Azərbaycan, Bakı, 11 mart /Trend/
Avropa İttifaqı Azərbaycanı bütün baxış və fikirlərin dinc şəraitdə ifadə olunması üçün vətəndaş cəmiyyətinin nümayəndələrilə açıq dialoqun saxlanmasına çağırır. Bu barədə Aİ-nin Azərbaycandakı ofisinin məlumatında deyilir.
Məlumatda bildirilir ki, Aİ nümayəndə heyəti ölkədə gənc fəalların həbs olunmalarına dair məlumatların sayının artmasını narahatlıqla diqqətə çatdırır.
Nümayəndə heyəti Azərbaycanda daxili inkişafı, o cümlədən demokratiya və insan haqları sahəsində vəziyyəti diqqətlə izləyir. Aİ hesab edir ki, bu sahələr siyasi sabitliyin və "Şərq tərəfdaşlığı"nın qurulduğu təməlin əsas elementləridir.
Məlumatda deyilir ki, Aİ nümayəndə heyəti Azərbaycanı gənc fəalların həbsi ilə bağlı bütün son hadisələrdə və ATƏT-lə demokratiya və insan haqları sahəsində qurulan əməkdaşlığın dəstəklənməsində lazımi hüquqi prosedurların təmin olunmasına çağırıb.
"Şərq tərəfdaşlığı" Aİ-nin qonşuluq siyasəti çərçivəsində altı postsovet ölkəsi - Azərbaycan, Ermənistan, Gürcüstan, Moldova, Belarus və Ukrayna ilə əlaqələrinin yaxşılaşdırılmasına yönəldilmiş Polşa-İsveç təşəbbüsüdür. Layihə çərçivəsində Aİ tərəfindən göstərilən ölkələrə 2013-cü ilədək 600 milyon avro ayrılması nəzərdə tutulub ki, bu vəsait dövlət institutlarının möhkəmləndirilməsi, sərhədlərə nəzarət və kiçik şirkətlərə yardım göstərilməsi məqsədi daşıyır. "Şərq tərəfdaşlığı"nın təsis sammiti 2009-cu il mayın 7-də Praqada keçirilib.
