...

Türkiyənin İğdır şəhərində 31 mart soyqırımına həsr olunmuş konfrans keçirilib (ƏLAVƏ OLUNUB)

Cəmiyyət Materials 1 Aprel 2011 23:45 (UTC +04:00)
Türkiyənin İğdır şəhərində 31 Mart Azərbaycanlıların Soyqırımı Gününə həsr olunmuş konfrans keçirilib.
Türkiyənin İğdır şəhərində 31 mart soyqırımına həsr olunmuş konfrans keçirilib (ƏLAVƏ OLUNUB)

Üçüncü abzasdan sonra təfərrüatlar əlavə olunub (ilk xəbər 14:38-də yayılıb)

Azərbaycan, Bakı, 1 aprel /Trend, müxbir M.Əliyev/

Türkiyənin İğdır şəhərində 31 Mart Azərbaycanlıların Soyqırımı Gününə həsr olunmuş konfrans keçirilib.

Trend-in məlumatına görə, Türkiyə Azərbaycan Dərnəyi və Türkiyə Beynəlxalq Münasibətlər və Strateji Analizlər Mərkəzi tərəfindən təşkil olunan tədbirdə Milli Məclisin deputatları Fəttah Heydərov, Qənirə Paşayeva, Azay Quliyev, Musa Qasımlı və Fazil Mustafa iştirak ediblər.

"İğdır və bölgədə Azərbaycan türklərinə qarşı soyqırım və erməni iddiaları" adlı konfransda Azərbaycan millət vəkilləri bildiriblər ki, ermənilərin işğalı nəticəsində bu gün Azərbaycanda bir milyondan çox qaçqın və məcburi köçkün var. Konfransda qeyd olunub ki, Türkiyə və bütün dünya erməni vəhşiliklərinə "dur" deməlidir.

Konfrans çərçivəsində millət vəkili, siyasi elmlər üzrə fəlsəfə doktoru Qənirə Paşayevanın və "Şərq" qəzetinin baş redaktoru, tədqiqatçı jurnalist Akif Aşırlının həmmüəllifi olduğu, Türkiyə türkcəsində çap edilmiş "Ermənilərin törətdiyi soyqırımın qurbanı - Bağanıs Ayrım" kitabının təqdimatı olub. Kitab erməni silahlı birləşmələrinin keçmiş sovet ordusunun köməyi ilə 1990-cı il martın 23-dən 24-nə keçən gecə Qazax rayonunun Bağanıs Ayrım kəndində törətdikləri soyqırım faktlarından bəhs edir.

Kitabda 1990-cı il martın 24-də erməni silahlılarının keçmiş sovet ordusuna məxsus hərbi texnikadan, müasir silahlardan istifadə edərək Qazax rayonunun Bağanıs Ayrım kəndinə hücum etməsindən, mülki əhalinin insanlığa sığmayan işgəncələrlə qətlə yetirilməsindən, diri-diri ocaqda yandırılmasından bəhs olunur. Eyni zamanda Bağanis Ayrım və onun qonşu kəndlərinin 20-ci əsrin əvvəllərində də ermənilər tərəfindən dağıdılması və dinc azərbaycanlı əhalisinə qarşı həyata keçirilən qətliamlar da kitabda faktlar və sənədlərlə öz əksini tapır.

Kitabda müəlliflərin soyqırımın şahidləri ilə söhbətləri və şahidlərin xatirələri öz əksini geniş şəkildə tapmışdır.Kitab konfrans iştirakçıları və İqdırlılar tərəfindən böyük maraqla qarşılanıb və paylanılıb. Tədbirdə çıxış edən Türkiyə Beynəlxalq Strateji Araşdırmalar Mərkəzinin rəhbəri və kitabın ön sözünün müəllifi Sinan Oğan Türkiyə türkcəsində çap olunmuş kitabın böyük əhəmiyyətindən danışıb və bildirib ki, bu Türkiyə vətəndaşlarının Azərbaycan həqiqətləri ilə bağlı daha geniş məlumatlar əldə etməsi üçün çox vacib və zəruridir.

O, kitabın xaricdə yaşayan türklərin də daha geniş məlumatlar əldə edə bilməsi üçün əhəmiyyətli olduğunu vurğulayıb. Millət vəkili, kitabın həmmüəllifi Qənirə Paşayeva isə bildirib ki, Dağlıq Qarabağ münaqişəsi, Azərbaycanın Ermənistan tərəfindən işbğal olunmuş torpaqları prolemi bütün Türk dünyasının ortaq problemi olmalıdır və dünyanın harasında yaşamasından asılı olmayaraq türk kökənli hər bir kəs Azərbaycan həqiqətlərinin dünya ictimaiyyətinə çatdırılması, erməni yalanlarının qarşısının alınması istiqamətində səylərini daha da gücləndirməlidir.

"Ermənilərin törətdiyi soyqırımın qurbanı - Bağanıs Ayrım" kitabı ilə yanaşı millət vəkili Qənirə Paşayevanın həmmüəllifi olduğu digər bir kitab "Xocalı Soyqırımı, Şahidlərin dilindən" kitabının Türkiyə türkcəsi də təqdim olunub və konfrans iştirakçıları arasında yayılıb. Yaxın günlərdə "Ermənilərin törətdiyi soyqırımın qurbanı - Bağanıs Ayrım" kitabının Türkiyənin paytaxtı Ankara şəhərində də təqdimat mərasimi keçiriləcək.

1918-ci ilin mart ayında hakimiyyəti ələ keçirmiş daşnaklar Stepan Şaumyanın rəhbərliyi ilə Azərbaycan xalqına qarşı amansız soyqırım törədiblər. Ümummilli lider Heydər Əliyevin 1998-ci ildə imzaladığı fərmana əsasən, 31 mart Azərbaycanlıların Soyqırımı Günü kimi qeyd edilir. Azərbaycan Milli Elmlər Akademiyası Tarix İnstitutunun məlumatına görə, martın 24-dən başlayaraq bir neçə gün ərzində Azərbaycan ərazisində 700 min nəfər soyqırıma məruz qalıb, Şamaxının 75, Qubanın 122, Zəngəzurun 115 kəndi ermənilər tərəfindən tamamilə məhv edilib.

Xəbər lenti

Xəbər lenti