Azərbaycan, Bakı, 31 may /Trend, müxbir İ.İsabalayeva/
Azərbaycanın zəngin musiqi nümunələrinin Avropada təbliğinin genişləndirilməsi məqsədilə İtaliyada "Muğam - Azərbaycanın müqəddəs musiqisi" adlı disk işıq üzü görüb. Bunu Trend-ə çərşənbə axşamı Mədəniyyət və Turizm Nazirliyinin mətbuat xidmətindən bildiriblər.
Disk Mədəniyyət və Turizm Nazirliyi və İtaliyanın "Felmay Corso Moncalieri" şirkəti arasında imzalanan müqaviləyə əsasən hazırlanıb.
Müqaviləyə görə, İtaliyada Azərbaycan mədəniyyətinin təbliğ olunması ilə əlaqədar "Azərbaycanın Ənənəvi Musiqisi" adı altında altı kompakt diskdə musiqi albomlarının hazırlanması və satışının həyata keçirilməsi planlaşdırılır.
Artıq Turin şəhərində (İtaliya) Şərq İncəsənəti Muzeyində "Darbar" adı altında konsert proqramında ilk diskin təqdimatı keçirilib. Bu diskə geniş səs diapazonuna malik tanınmış xanəndə Qoçaq Əsgərovun ifasında Zabul Segah dəstgahı, Bayatı Şiraz muğamı və təsnifi, Mahur muğam kompozisiyası, Dilkeş muğamı və iki xalq rəqsi daxildir.
İfalar lentə alınarkən bütün müasir muğam ansambllarının özəyini təşkil edən kamança, tar, qaval, balaban və nağara kimi milli musiqi alətlərimizdən istifadə olunub.