Azərbaycan, Bakı, 17 iyun /Trend/
Azərbaycan Mətbuat Şurası iyunun 15-də Bakıda ABŞ jurnalisti Amanda Eriksona və Böyük Britaniyadan olan hüquq müdafiəçisi Silya Devisə naməlum şəxslər tərəfindən fiziki təzyiq göstərilməsi ilə bağlı Daxili İşlər Nazirliyinə müraciət ünvanlayıb. Trend-in məlumatına görə, bu barədə Şuradan cümə günü bildirilib.
Müraciətdə bildirilir ki, Erikson və Devisin ölkəmizdəki fəaliyyəti yerli qeyri-hökumət təşkilatları ilə əməkdaşlıq etməkdən, jurnalistlər və vətəndaş cəmiyyətinin fəalları üçün treninqlər keçirməkdən ibarət olub. Qeyd olunur ki, Erikson həmçinin ABŞ-ın nüfuzlu "Vaşinqton Post" və "Nyu-York Tayms" qəzetləri ilə də əməkdaşlıq edir.
"Mətbuat Şurası hər iki şəxsə qarşı təzyiq faktını pisləyir, bunu ölkəmiz barədə mənfi rəy yaratmağa yönələn təxribat xarakterli əməl kimi dəyərləndirir", - müraciətdə deyilir.
Məktubda həmçinin hadisəni törədənlərin tezliklə tapılaraq qanuna müvafiq surətdə məsuliyyətə cəlb edilməsinin vacibliyi vurğulanıb.