Azərbaycan, Bakı, 4 dekabr / Trend müxbir M.Əliyev/
Ukrayna Azərbaycanlı Gənclər Birliyinin (UAGB) 2-ci forumuna yekun vurulub. Bu barədə bazar günü Trend-ə UAGB-nin mətbuat xidmətindən bildirilir.
Forumun sonuncu günü Birliyin 2-ci forum iştirakçıları Ulu Öndər Heydər Əliyevin Kiyev şəhərindəki abidəsinin, ö cümlədən Azərbaycanın görkəmli elm xadimi, akademik Zərifə Əliyevanın İrpen şəhərindəki büstünün önünə çiçəklər qoymaqla növbəti müzakirələrini panel iclaslarında davam etdirdilər. İclasda azərbaycanlı gənclərin milli mənəvi dəyərlərini qoruyub yaşatmaları şərti ilə Ukraynanın ictimai, siyasi, elmi, mədəni həyatına inteqrasiya olunmaları istiqamətində irəli sürülən tövsiyələr, ermənilərin Azərbaycana qarşı həyata keçirtdikləri ideoloji təxribatların qarşısının alınmasında birgə mübarizənin aparılması strategiyasının düzgün qurulması Forumun uğurlu nəticələri kimi dəyərləndirilib.
Ukrayna Azərbaycanlı Gənclər Birliyinin böyük inkişaf yolu keçdiyini bildirən Azərbaycan gənclər və idman nazirinin müavini İntiqam Babayev, İrəli ictimai birliyinin sədri, millət vəkili Ceyhun Osmanlı, Xarici işlər nazirliyinin rəsmi nümayəndəsi Azər Xudiyev, BMT-nin Azərbaycandakı proqram rəhbəri Məzahir Əfəndiyev, və digər panel moderatorları müzakirələrin çox aktiv və səmərəli təkliflərlə yadda qaldığını bildiriblər.
2 gün davam edən forumun yekun mərasimində Ukrayna Azərbaycanlı gənclər birliyinin sədri Anar Tahirov çıxış edərək, belə bir tarixi toplantıda Azərbaycan rəsmi dövlət nümayəndələrinin iştirak etməsini, xüsusəndə Rusiyadakı Azərbaycan Gənclər təşkilatının sədri Leyla Əliyevanın forum iştirakçılarına ünvanladığı təbrik məktubunun Ukraynadakı azərbaycanlı gənclərin gələcək inkişafında mənəvi stimula çevrildiyini bildirib. Azərbaycan Dövlət Neft Şirkətinin Ukrayna Azərbaycanlı Gənclər Birliyini ofislə təmin etməsini ölkəmizdə bir çox sahələrlə yanaşı dövlət səviyyəsində gənclər hərəkatının inkişafına göstərilən diqqət və qayğının məntiqi nəticəsi kimi dəyərləndirib. Forumun uğurla başa çatmasına görə Ukrayna Azərbaycanlı Gənclər birliyinin nümayəndələrni təbrik edən Azərbaycanın Ukraynadakı səfiri Eynulla Mədətli, gənclər və idman nazirinin müavini İntiqam Babayev və digər şəxslər sıralarını günü gündən genişləndirən birliyin fəallarına gələcək işlərində uğurlar arzulayıblar.
Forum çərçivəsində Forum iştirakçılarının Azərbaycan Prezidenti İlham Əliyevə müraciəti səsləndirilib. Müraciətdə Ukrayna Azərbaycanlı Gənclər Birliyinin II Forumunun iştirakçıları Ulu Öndər Heydər Əliyevin siyasi kursunun layiqli davamçısi kimi İlham Əliyevin rəhbərliyi ilə Azərbaycanda həyata keçirilən dövlət quruculuğu prosesini ürəkdən alqışladıqlarını, müstəqil dövlətimizin dünyanın inkişaf etmiş ölkələri arasında öz layiqli yerini tutması istiqamətində dövlət başçısının həyata keçirtdiyi məqsədyönlü daxili və xarici siyasəti dəstəklədiklərini bəyan ediblər.
Tədbirdə Forumun təşkil olunmasında xidmətləri olan bir qrup şəxsə birliyin fəxri diplomları təqdim olunub.
