Azərbaycan, Bakı, 9 dekabr /Trend, müxbir İ.İsabalayeva/
"Eurovision-2012" mahnı müsabiqəsi ilə bağlı Bakıdakı hotellərdə xidmətlərin səviyyəsinin yüksəldilməsi üçün treninqlərin keçirilməsi nəzərdə tutulur. Trend-in məlumatına görə, bunu jurnalistlərə Mədəniyyət və Turizm Nazirliyinin Turizm şöbəsinin müdiri Aydın İsmiyev deyib. Onun sözlərinə görə, treninqlərin gələn ilin fevral-aprel aylarında keçirilməsi planlaşdırılır.
İsmiyev hazırda "Eurovision"a gələcək qonaqlara xidmət göstərmək üçün şirkətlər arasında seçim aparılıb-aparılmayacağı ilə bağlı hər hansı mexanizmin hazırlanmadığını da qeyd edib. Onun fikrincə, normal fəaliyyət göstərən turizm şirkətləri "Eurovision"a gələcək qonaqlara xidmət göstərə biləcəklər.
Azərbaycan təmsilçiləri Eldar Qasımov və Nigar Camal (Ell/Nikki) "Running Scared" mahnısı ilə "Eurovision 2011" müsabiqəsinin qalibi olub.
"Euorvision 2012" mahnı müsabiqəsinin yarımfinal mərhələləri gələn il mayın 22 və 24-də, finalı isə mayın 26-da Bakıda keçiriləcək.