...

Əmək və əhalinin sosial müdafiəsi naziri müxtəlif bölgələrin sakinlərini qəbul edib (FOTO)

Cəmiyyət Materials 14 İyun 2012 14:16 (UTC +04:00)
Əmək və əhalinin sosial müdafiəsi naziri Fizuli Ələkbərov nazirliyin 142 - qaynar xətti vasitəsilə müraciət edən vətəndaşları, həmçinin nazirlikdə yaradılmış VC (videokonfrans) sistemi vasitəsilə müxtəlif bölgələrin sakinlərini qəbul edib.
Əmək və əhalinin sosial müdafiəsi naziri müxtəlif bölgələrin sakinlərini qəbul edib (FOTO)

Azərbaycan, Bakı, 14 iyun /Trend/

Əmək və əhalinin sosial müdafiəsi naziri Fizuli Ələkbərov nazirliyin 142 - qaynar xətti vasitəsilə müraciət edən vətəndaşları, həmçinin nazirlikdə yaradılmış VC (videokonfrans) sistemi vasitəsilə müxtəlif bölgələrin sakinlərini qəbul edib.

Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən cümə axşamı Trend-ə verilən məlumata görə, Ələkbərov bildirib ki, bugünkü tədbir əlamətdar bir vaxta təsadüf edir. Respublika ictimaiyyəti və bütün dünya azərbaycanlıları sonsuz qürur hissi ilə 15 İyun - Milli Qurtuluş Gününü qeyd etməyə hazırlaşır.

"Biz ötən il Azərbaycanın dövlət müstəqilliyinin bərpasının 20-ci ildönümünü ümumxalq bayramı səviyyəsində qeyd etdik. Bu 20 illik müstəqillik dövründə Azərbaycanın əldə etdiyi böyük tarixi nailiyyətlər məhz 1993-cü ilin 15 iyun günündən qaynaqlanır", - deyən nazir 1993-2003-cü illərdə ölkəmizdə bütün sahələrdə olduğu kimi, sosial müdafiə sahəsində də konkret və məqsədyönlü işlər görüldüyünü, ümummilli liderin müdrik və uzaqgörən siyasi kursunun Prezident İlham Əliyev tərəfindən uğurla davam və inkişaf etdirildiyini vurğulayıb, vətənimizə firavan sabahlar, dövlətimizə daimi tərəqqi arzulayıb.

Vətəndaşların müraciətləri araşdırılarkən ayrı-ayrı vətəndaşların ünvanlı sosial yardımların təyinatı, əlillik dərəcələrinin verilməsi və reabilitasiya vasitələri ilə təmin olunma, əmək hüquqlarının bərpası, məşğulluğun təminatı və s. məsələlərlə bağlı qanunvericilik barədə məlumatsız olduqları müəyyən edilib və onlara hüquqi izahatlar verilib. Həmçinin, ayrı-ayrı vətəndaşlar zəruri sənədləri toplayaraq təqdim edə bilmədiklərinə görə onlara ünvanlı yardım, yaxud əlillik təyinatının aparılmasının mümkün olmadığı, bu səbəbdən onların şikayət xarakterli müraciətlər etdiyi məlum olub.

Bununla yanaşı, müraciətlərin bir qismində əksini tapan narazılıqların əsaslı olduğu, yerli strukturların bəzi əməkdaşları tərəfindən bir sıra hallarda vətəndaş müraciətlərinə biganə və səhlənkar münasibət göstərildiyi, belə halların, eyni zamanda, bəzən vətəndaşa lazımı şəkildə izahat verilməməsinin vətəndaşların müxtəlif instansiyalara şikayət xarakterli müraciətlər etməsinə şərait yaratdığı müəyyən edilib.

Nazir Fizuli Ələkbərov vətəndaşların haqlı narazılığına səbəb olan halların aradan qaldırılması, belə hallara yol vermiş əməkdaşlar barədə intizam tədbirlərinin davam etdirilməsi, hər bir vətəndaşın müraciətinin diqqətlə araşdırılması və müraciətlərdə qaldırılan məsələlərin qanunvericiliyin tələblərinə uyğun həlli, özündən asılı olmayan səbəblərdən yoxsulluq vəziyyətində yaşayan və dövlətin yardımına həqiqətən ehtiyacı olan, lakin bunun üçün zəruri sənədləri toplamaqda çətinlik çəkən vətəndaşlara bu sahədə mümkün köməkliklərin göstərilməsi, 142 - qaynar xətlə bağlı əhali arasında məlumatlandırma işlərinin gücləndirilməsi və s. barədə müvafiq strukturlara tapşırıqlar verib.

Qəbul zamanı yoxsulluq vəziyyətindən çıxmaq üçün potensial imkanlara malik olan ailələr də müəyyən edilib və onların gələcəkdə aktiv sosial müdafiə tədbirlərinə, "Özünədəstək" proqramına, eləcə də cari ildə işə salınacaq sosial kreditləşmə proqramına cəlb edilmələri qərara alınıb.

Qeyd edək ki, 2011-ci il və cari ilin ötən dövrü ərzində əmək və əhalinin sosial müdafiəsi naziri və nazirliyin digər rəhbər şəxsləri tərəfindən müxtəlif bölgələrdə 800 nəfərdən çox vətəndaş qəbul edilərək müraciətləri araşdırılıb. Həmin müraciətlərin böyük qisminin daha çox sorğu xarakterli olduğu məlum olub. Həyata keçirilən belə tədbirlər nazirliyin fəaliyyət dairəsinə aid sahələrlə bağlı şikayət xarakterli müraciətlərin sayının azalması ilə nəticələnir. Cari ilin 5 ayı ərzində nazirliyə 142 - qaynar xətt vasitəsilə 1799, elektron xidmətlər vasitəsilə 955 müraciət daxil olub. Həmin müraciətlərlə bağlı məqsədyönlü tədbirlər görülüb.

Xəbər lenti

Xəbər lenti