Azərbaycan, Bakı, 27 iyul /Trend/
Azərbaycan regionlarında yaşayan əlil vətəndaşların protez-ortopediya məmulatları ilə təminatı onların yaşadıqları bölgədə səyyar şəkildə həyata keçirilir. Bu sahədə növbəti tədbir kimi, iyulun 27-də Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzinin səyyar tibbi-texniki briqadası tərəfindən Şəki şəhərində bir qrup əlilə səyyar formada protez-ortopedik bərpa xidməti göstərilib.
Nazirliyin İctimaiyyətlə əlaqələr şöbəsindən Trend-ə verilən məlumata görə, ümumiyyətlə, son üç gün ərzində həmin briqada tərəfindən Şamaxı-Şəki bölgəsi üzrə 40 nəfərə yaxın əlil şəxs protez-ortopedik bərpa xidməti ilə təmin edilib.
Tədbirdə iştirak edən Əmək və Əhalinin Sosial Müdafiəsi Nazirliyinin Əlillərin sosial müdafiəsi siyasəti şöbəsinin müdir müavini Saday Abdullayev KİV-ə müsahibəsində bildirib ki, Nazirlər Kabinetinin 2002-ci il 8 iyul tarixli qərarı ilə təsdiq edilmiş qaydalara əsasən, ölkədə əlilliyi olan şəxslərin protez-ortopediya məmulatları ilə təmin edilməsi işləri ambulator, stasionar formada olmaqla yanaşı, səyyar formada da həyata keçirilir.
Belə ki, müxtəlif bölgələrdə yaşayan, dayaq-hərəkət sistemi pozulmuş, protez-ortopediya məmulatlarına ehtiyac duyan əlil şəxslər səyyar tibbi-texniki briqadalar tərəfindən yaşadıqları regionlarda protez-ortopediya və reabilitasiya xidməti ilə təmin olunurlar. Qeyd olunub ki, il ərzində Protez-Ortopedik Bərpa Mərkəzi tərəfindən 5500-dən çox əlil şəxsə, o cümlədən müxtəlif bölgələrdə səyyar formada 300 nəfərə yaxın əlil şəxsə protez-ortopediya xidməti göstərilir.
Həmin gün Şəki şəhər Əhalinin Sosial Müdafiəsi Mərkəzində keçirilən iclasda isə bölgədə yaşayan əlillərin müraciətlərinə baxılması sahəsində vəziyyət geniş müzakirə olunub, yerli strukturlara müvafiq tapşırıqlar verilib.