Azərbaycan, Bakı, 3 oktyabr /Trend, müxbir İ.İsabalayeva/
Oktyabrın 4-də və 5-də Azərbaycanın bəzi ərazilərində yenidən yağış yağacaq.
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev çərşənbə günü Trend-ə bildirib ki, oktyabrın 4-də və 5-də ölkə ərazisində havanın temperaturunda ciddi dəyişiklik olmayacaq. Ancaq oktyabrın 4-də dağlıq və dağ ətəyi rayonlarda şimşək çaxacaq, qısa müddətli yağış yağacaq. Oktyabrın 5-də isə gündüz yağışın tədricən kəsiləcəyi gözlənilir.
Verdiyev Bakıda da hava şəraitində ciddi dəyişikliyin baş verməyəcəyini qeyd edib. O, deyib ki, yaxın 2 gün ərzində Bakıda gündüz saatlarında havanın temperaturu 25-28, Aran rayonlarında 25-30, dağlıq rayonlarda isə 19-24 dərəcə isti olacaq.