Azərbaycan, Bakı, 15 dekabr /Trend, müxbir İ.İsabalayeva/
Tələbə Qəbulu üzrə Dövlət Komissiyasi "Şagird-məzun" bazasının formalaşdırılması ilə bağlı seminarlara başlayır.
Komissiyanın mətbuat xidmətindən şənbə günü Trend-ə verilən məlumata görə, Azərbaycan Prezidentinin müvafiq fərmanına əsasən ümumi təhsili həyata keçirən təhsil müəssisələrində ümumtəhsil fənləri üzrə təhsilalanların biliyinin yekun qiymətləndirilməsinin həyata keçirilməsi ilə əlaqədar TQDK 2012-2013-cü tədris ili üçün "Şagird-məzun" bazasının formalaşdırır.
Bu məqsədlə qurum ümumi və tam orta təhsil müəssisələrinin buraxılış siniflərinin şagirdləri haqqında məlumatların "Şagird-məzun" bazasına daxil edilməsi üçün respublikanın rayon və şəhərlərində məsul şəxslərlə seminar-məşğələlər təşkil edir.
İlk seminar-məşğələ dekabrın 19-da Ağcabədi, Goranboy, Oğuz, Gədəbəy, Ağstafa, Biləsuvar, Şabran, Quba, İmişli, Kürdəmir, Qobustan, Göyçay, Bərdə, Beyləqan, Balakən, Cəlilabad, Astara, Gəncə, Şamaxıda keçiriləcək. Seminar-məşğələlər dekabrın 24-də yekunlaşacaq.