Azərbaycan, Bakı, 12 noyabr /Trend/
Noyabrın 4-də Xəzər dənizinin Xaçmaz sahilində itkin düşən üç balıqçıdan daha birinin - İlqar Daşdəmirovun meyidi tapılıb.
Trend-in əldə etdiyi məlumata görə, İ.Daşdəmirovun meyidi bu gün səhər saatlarında tapılıb.
Hadisə baş verdikdən sonra itkin düşən üç balıqçının axtarışlarına bir helikopter və FHN-nin Xaçmaz regional bürosunun əməkdaşları cəlb olunmuşdu.
İtkin düşən balıqçılardan birinin Həmzə Nurəddinovun meyidi ötən həftə tapılmışdı. Laçın Laçınovun meyidinin isə hələlik tapılmadığı bildirilir.
İtkin düşən balıqçılardan ikisi - Həmzə Nurəddinov, Laçın Laçınov rayonun Tikanoba kənd sakinləridir, İlqar Daşdəmirov isə Uzunoba kənd sakinidir.
Qeyd edək ki, noyabrın 4-də Xəzər dənizinin Xaçmaz sahilində içərisində 3 nəfərin olduğu balıqçı qayığı ilə əlaqə kəsilib. Balıqçı qayığında olan şəxslərlə yaxınları telefonla danışıb. Bir müddətdən sonra isə əlaqə itib və bu barədə FHN-ə məlumat verilib.