...

Saday Şəkərli cəzaçəkmə müəssisəsinə qaytarıldı

Cəmiyyət Materials 18 Noyabr 2016 14:06 (UTC +04:00)
Hədə yolu ilə pul tələb etməkdə təqsirləndirilərək həbs olunan yazıçı-şair Saday Şəkərli 6 saylı cəzaçəkmə müəssisəsinə qaytarılıb.
Saday Şəkərli cəzaçəkmə müəssisəsinə qaytarıldı

Bakı. Samir Əli - Trend:

Hədə yolu ilə pul tələb etməkdə təqsirləndirilərək həbs olunan yazıçı-şair Saday Şəkərli 6 saylı cəzaçəkmə müəssisəsinə qaytarılıb. Bu barədə Trend-ə açıqlamasında S.Şəkərlinin vəkili Fəxrəddin Mehtiyev məlumat verib.

Vəkil bildirib ki, S.Şəkərlinin səhhəti nisbətən sabitləşdiyindən o, Ədliyyə Nazirliyi Penitensiar Xidmətin Müalicə müəssisəsindən cəzaçəkmə müəssisəsinə qaytarılıb. Amma hazırda cəzaçəkmə müəssisəsində həkim nəzarətində saxlanılır.

Qeyd edək ki, S.Şəkərli şəkər xəstəliyindən əziyyət çəkir. O, istintaq dövründə də saxlanıldığı 1 saylı Bakı İstintaq təcridxanasında səhhətində problem yarandığı üçün Müalicə müəssisəsinə köçürülmüşdü və bir neçə ay orada müalicə olunmuşdu.

Qeyd edək ki, Baş Prokurorluğun mətbuat xidmətinin yaydığı məlumatda bildirilirdi ki, Bakı şəhər sakini Saday Şəkərovun (Saday Şəkərli) külli miqdarda əmlak əldə etmək məqsədilə Vergilər Nazirliyinin vəzifəli şəxsi haqqında kütləvi informasiya vasitələrində ifşaedici, onu nüfuzdan salan, uydurma yazılar yazmaqla, barəsində rüsvayedici məlumatlar yayma hədəsi ilə tələb etdiyi 10 min manat məbləğində pulu almasında şübhələr üçün əsaslar olduğundan faktla bağlı Cinayət Məcəlləsinin 182.3.2-ci (külli miqdarda əmlakı hədə-qorxu ilə tələb etmə) maddəsi ilə cinayət işi başlanıb. S.Şəkərov iş üzrə təqsirləndirilən şəxs qismində cəlb edilərək, ona Cinayət Məcəlləsinin qeyd edilən maddəsində nəzərdə tutulan ittiham elan edilməklə, məhkəmənin qərarı ilə barəsində həbs qətimkan tədbiri seçilib.

Bakı Ağır Cinayətlər Məhkəməsinin hökmü ilə S.Şəkərli 10 il müddətinə azadlıqdan məhrum edilsə də, Bakı Apelyasiya Məhkəməsi hökmü dəyişdirərək onun cəzasını 5 ilə endirib. Müdafiə tərəfi isə qərarla razılaşmayaraq kasasiya şikayəti verib.

Məqalədə:
Xəbər lenti

Xəbər lenti