...

Mingəçevirdə Kodlaşdırma üzrə İntensiv Tədris Düşərgəsi başa çatdı (FOTO)

Cəmiyyət Materials 3 Fevral 2019 16:23 (UTC +04:00)
Mingəçevir şəhərində məcburi köçkün uşaqları üçün “Code for Future” şüarı ilə həyata keçirilən ("Gələcəyi kodlaşdır") Kodlaşdırma üzrə İntensiv Tədris Düşərgəsi başa çatıb
Mingəçevirdə Kodlaşdırma üzrə İntensiv Tədris Düşərgəsi başa çatdı  (FOTO)

Bakı. Trend:

Mingəçevir şəhərində məcburi köçkün uşaqları üçün “Code for Future” şüarı ilə həyata keçirilən ("Gələcəyi kodlaşdır") Kodlaşdırma üzrə İntensiv Tədris Düşərgəsi başa çatıb.

Trend-in məlumatına görə, ötən ilin dekabr ayından start verilən Tədris Düşərgəsində iştirak etmək və gələcəyin ən önəmlı bacarıqlarından olan kodlaşdırmaya yiyələnmək üçün 358 şagird imtahanlarda iştirak edib. Seçimlərə əsasən, ən yaxşı nəticə göstərən 60 iştirakçı Düşərgəyə qəbul olunub.

Həmin iştirakçılar ölkəmizin ən qabaqcıl müəllimlərinin iştirakı ilə 25 yanvar – 03 fevral 2019-ci il tarixlərində 10 günlük sürətləndirilmiş tədris düşərgəsində (bootcamp) iştirak ediblər. Düşərgə çərçivəsində məktəblilər proqramlaşdırmanın əsaslarını öyrənib, Scratch, HTML və CSS kimi proqramlaşdırma dilləri ilə yaxından tanış olublar. Şagirdlər kodlaşdırma dərsləri almaqla yanaşı, sosial bacarıqlarının və liderlik qabiliyyətlərinin inkişaf etdirilməsi üçün əlavə təlimlərdə də iştirak ediblər.

İştirakçılardan ən yaxşı nəticələr göstərən 4 nəfər, Əhmədova Nəzrin, Vəliyev Şamxal, Vəlizadə Vüqar və Bərxudarov Orxan sonda notbukla mükafatlandırılıb. Həmçinin informasiya texnologiyaları sahəsində xüsusi bacarıqları ilə seçilən 2 nəfər iştirakçı Qasımov Uğur və Tağıyev Nurlan Bakıda uzun müddətli pulsuz təhsil almaq imkanı qazanıb.

Məlumat üçün bildirək ki, layihənin əsas məqsədi Mingəçevir şəhər ərazisində məskunlaşmış məcburi köçkün məktəblilərinin İT savadlılığının artırılması və kodlaşdırma (programlaşdırma) bacarıqlarını inkişaf etdirilməsi, müəllimlərin tədris potensialını gücləndirilməsidir.

Məktəblilərə dəqiq elmləri öyrətməyi, yeni kəşflər etməyi və yeni dostluqlar qazandırmağı qarşısına məqsəd qoyan Kodlaşdırma üzrə İntensiv Tədris Düşərgəsində iştirak pulsuzdur. Lahiyə ABŞ-ın Azərbaycandakı səfirliyi tərəfindən yerli icmaların inkişafı və inklüziv tərəqqinin artırılması məqsədilə dəstəklənir.

Bənzər layihə ilk olaraq 5-14 sentyabr 2018-ci il tarixlərində Cəbrayıl rayonundan olan məcburi köçkün uşaqlar üçün Biləsuvar rayonu ərazisində uğurla həyata keçirilib.

Məqalədə:
Xəbər lenti

Xəbər lenti