Bakı. İlhamə İsabalayeva - Trend:
Bu il I qrupda 600-dən çox bal toplayanların sayı çoxalıb.
Trend-in məlumatına görə, bunu Dövlət İmtahan Mərkəzinin (DİM) Direktorlar Şurasının sədri Məleykə Abbaszadə deyib.
Onun sözlərinə görə, birinci qrupda azalan yerlərin sayı 229-dur. Bu il birinci qrupda 600-dən çox bal toplayanlar 611 nəfər olduğu halda, keçən il bu say 553 idi.
M.Abbaszadə qeyd edib ki, bu səbəbdən I qrupda yüksək maraq olan ixtisaslar üzrə keçid ballarının yüksək olacağı gözlənilir.
DİM sədri əlavə edib ki, bu il 500-dən çox bal toplayanların sayı 1 903, keçən il 1 864 nəfər, bu il 400-dən çox bal toplayanların sayı 3 931, keçən il 3 935 nəfər olub. 400-dən aşağı bal toplayanların sayı da təxminən eyni səviyyədə qalıb. I qrupda plan yerlərinin azalmasına baxmayaraq, builki müsabiqə vəziyyətinin ötənilki kimi olacağı gözlənilir.