Bakı. Trend:
Xaçmaz rayonunun fındıq bağlarında məhsul yığımı davam edir. Əvvəlki illərlə müqayisədə bu il bağlarda məhsuldarlıq yüksəkdir. Məhsulun bol olması təsərrüfatçıların daha çox gəlir əldə etməsinə şərait yaradır.
Xaçmaz Rayon İcra Hakimiyyətinin başçısı Elnur Rzayev Palçıqoba kəndinin fındıq bağlarında olub, məhsuldarqlıqla maraqlanıb.
Elnur Rzayev bildirib ki, rayonda 12 min hektara yaxın fındıq bağı var. Bu bağların 6200 hektarından məhsul toplanır. Ötən il bu bağlardan 8500 ton fındıq yığılıb.
Bağlarda məhsulun bol olması rayonda yeni fındıq emal müəssələrinin yaradılmasına zəmn yaradıb. Hazırda Xaçmaz rayonunda 10-dan çox fındıq emalı müəssisəsi və qəbul məntəqələri fəaliyyət göstərir. Bağlardan yığılan məhsullar emal müəssisələrinə təhvil verilir. Fındıq yerli bazarlarla yanaşı, Rusiya, Türkiyə və digər xarici ölkələrə ixrac edilir. Rayonda yeni fındıq bağlarının salınması istiqamətində işlər davam etdirilir.
Bağ sahibləri aqrar sektorun inkişafına göstərilən diqqət və qayğını yüksək qiymətləndirib, yaradılan şəraitə görə Azərbaycan Respublikasının Prezidenti İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.
