Bakı. Trend:
Ali təhsil müəssisələrində proqramların dəyişməsi sürətli olan proses deyil. Cəmiyyət olaraq başa düşməliyik ki, dəyişiklik ağrılı prosessdir.
Trend xəbər verir ki, bu barədə elm və təhsil naziri Emin Əmrullayev Təhsilin İnkişafı Forumunda çıxışı zamanı deyib.
O qeyd edib ki, universitetlərdə proqram dəyişikliyi olması hansısa fənn müəlliminin işini itirməsi deməkdir.
“Hər bir sahədə dəyişiklik çətindir. Obyektiv reallıq var ki, məhdud şərtlərlə dəyişiklik etmək mümkün deyil. Biz başa düşməliyik ki, A nöqtəsindən Z nöqtəsində getmək kifayət qədər enerji sərf etmək və ağrılı qərar vermək tələb edir. Biz bu ağrılı prosessə hazırıq?
Proqramlarımızla bağlı problem odur ki, kifayət qədər fənn var, onları keçməyə ehtiyac yoxdur. Əvvəlcə problemi tanımalıyıq. Bu yalnızca universitetlərin yükü deyil. Bugünki proqramlar 20 il əvvəlkiylə müqayisədə daha mütərəqqidir”,- deyə nazir əlavə edib.
Qeyd edək ki, Bakıda Təhsilin İnkişafı Forumu keçirilir.
Təhsilin İnkişafı Forumu 2024-ün əsas məqsədi dövlət-universitet-sənaye tərəfdaşlığının dayanıqlı və davamlı inkişafı ilə yanaşı birgə dialoq üçün uyğun platforma təmin etmək və prosesi hərtərəfli dəstəkləməkdir.
Forum hər il ölkənin təhsil sisteminin cari vəziyyəti, iqtisadiyyata inteqrasiyası, dövlət-özəl tərəfdaşlığının inkişaf perspektivlərinə dair ən vacib məsələlərin müzakirəsi üçün faydalı platforma təmin edir.