DİN Cinayət-Axtarış İdarəsinin keçmiş baş əməliyyat müvəkilli polkovnik-leytenant Hacı Məmmədovun qızına - Almaz Məmmədovaya şəxsiyyət vəsiqəsi verilmir. Bu barədə Trend ə Almaz Məmmədova özü məlumat verib.
Onun sözlərinə görə, bir müddətdir ki, şəxsiyyət vəsiqəsi almaq üçün sənədlərini Xətai RPİ Pasport və Şəxsiyyət Vəsiqələrinin Verilməsi Şöbəsinə təqdim etsə də ona şəxsiyyət vəsiqəsi verilmir.
"Əvvəlcə sənədlərimi qəbul etdilər, ancaq biləndə ki, Hacı Məmmədovun qızıyam, heç bir səbəb göstərmədən geri qaytardılar" deyən Almaz Məmmədova bununla bağlı şöbə rəisi Mirəli Seyidova müraciət etmək istəsə də, rəis onu qəbul etməyib.
Xətai RPİ Pasport və Şəxsiyyət Vəsiqəsinin Verilməsi Şöbəsinin inspektoru Rəşad Sadıqov bizimlə söhbətində Almaz Məmmədovaya şəxsiyyət vəsiqəsinin verilməməsi məsələsinə aydınlıq gətirməkdən imtina etdi.
Bildirdi ki, Almaz Məmmədova növbəti dəfə sənədlərini götürub şöbəyə gəlsin, ona mütləq şəxsiyyət vəsiqəsi veriləcək.
