Fevralın 20-də Ombudsman Aparatında Beynəlxalq Ana Dili Günü münasibətilə dəyirmi masa keçirilib. Trend in məlumatına görə, tədbirdə Azərbaycan Respublikasının İnsan Hüquqları üzrə Müvəkkili (ombudsman) Elmira Süleymanova Xocalı soyqırımı haqqında danışıb, erməni təcavüzünün ağır nəticələrindən, insan haqlarını pozmasından söz açıb, faciə ilə bağlı özünün bəyanatını diqqətə çatdırıb.
Sonra ombudsman 21 fevral - Beynəlxalq Ana Dili Günü haqqında danışıb, ölkəmizdə dövlət dilinin Azərbaycan dili olması, hökumətin dilimizin qayğısına qalması, qoruması barədə fikirlərini bölüşüb. Müvəkkil qeyd edib ki, Azərbaycanda dil əlaməti əsasında, həmçinin dini etiqada görə insan hüquqlarının məhdudlaşdırılması, ayrıseçkilik edilməsi yolverilməzdir. Tədbirdə iştirak edən digər qonaqlar, alimlər, dilçilər Azərbaycanın dövlət dilinin zənginliyi, onun tətbiqi, qorunması, inkişaf etdirilməsi, həmçinin "Dövlət dili haqqında" Qanun barədə danışıblar, eyni zamanda dövlət qulluğuna götürülən bütün şəxslərin ana dilini mükəmməl bilməsinin, küçə reklamlarının Azərbaycan dilində tərtib olunmasının, latın qrafikası ilə yeni lüğətlərin mükəmməl, qüsursuz çap edilməsinin vacibliyini vurğulayıblar.