İş adamları olan Zülfüqarlı qardaşları barədə cinayət işinə xitam verilib. Bu barədə Trend ə vəkil Aslan İsmayılov məlumat verib.
"Bakı elektroştamp" Açıq Tipli Səhmdar Cəmiyyətinin sahibi olan Loğman və Nurəddin Zülfüqarlı qardaşları hədə-qorxu ilə pul tələb etməkdə şübhəli bilinirdilər.
2005-ci ilin dekabr ayında DİN Baş Mütəşəkkil Cinayətkarlıqla Mübarizə İdarəsinin İstintaq Şöbəsi tərəfindən qardaşlara qarşı Azərbaycan Respublikası Cinayət Məcəlləsinin 182.2 (hədə-qorxu yolu ilə tələb etmə) maddəsi ilə cinayət işi başlanmışdı. Lakin istintaqın gedişində Zülfüqarlı qardaşlarının əməllərində cinayət tərkibi aşkar edilməyib və cinayət işinə xitam verilib.