Moskva şəhərində xüsusi saxlanma məntəqəsində saxlanılan 10 nəfər azərbaycanlı yaxın günlərdə Azərbaycana deportasiya ediləcək. Bu barədə Trend ə Ümumrusiya Azərbaycanlıları Konqresinin (ÜAK) Moskva şəhər təşkilatının sədri İlqar Hacıyev məlumat verib.
İ.Hacıyev qeyd edib ki, Rusiyada miqrantların hüquqi statusu haqqında yeni qanun çıxarılandan sonra ölkədə qeyri-leqal yaşayan miqrantlarla bağlı Moskvada xüsusi saxlanma məntəqəsi yaradılıb. Həmin məntəqədə sənədlərində, fəaliyyətində qanun pozuntuları olan miqrantlar saxlanılır və öz ölkələrinə deportasiya edilirlər. Hazırda orada 10 nəfər Azərbaycan Respublikasının vətəndaşı saxlanılır.
İ.Hacıyev onu da deyib ki, Rusiyada səfərdə olan Azərbaycan Respublikasının İnsan Haqları üzrə Müvəkkili (Ombudsman) Elmira Süleymanova Moskvadakı xüsusi saxlanma məntəqəsində olan həmin azərbaycanlılarla görüşüb. E.Süleymanova həmçinin Rusiyanın Ombudsmanı Vladimir Lukinlə görüş keçirib.
