Azərbaycan, Bakı / Trend müxbir K.Zərbalıyeva/ Budapeşt şəhər məhkəməsinin hökmü ilə ömürlük azadlıqdan məhrum edilmiş Azərbaycan Silahlı Qüvvələrinin zabiti Ramil Səfərovun cəzasını çəkməsi üçün öz ölkəsinə verilməsi ilə bağlı Ədliyyə Nazirliyi müvafiq tədbirlərin icrasına başlayıb.
Ədliyyə Nazirliyinin İnsan Hüquqları və İctimaiyyətlə Əlaqələr İdarəsinin rəisi Faiq Qurbanov bildirib ki, R.Səfərov barəsində hökm qanuni qüvvəyə minəndən sonra onun Azərbaycana verilməsi ilə bağlı nazirliyin Beynəlxalq Əlaqələr İdarəsi müvafiq addımlar atıb. Hazırda bu istiqamətdə işlərin davam etdiyini deyən idarə rəisi bu məsələnin müsbət həllinin Macarıstanın müvafiq nazirliyindən asılı olduğunu bildirib: "Bu məsələ "Məhkumların cəza çəkməsi üçün vətəndaşı olduğu ölkəyə verilməsi barədə" Avropa Konvensiyasına uyğun həll olunmalıdır. Ramil Səfərovun Azərbaycana verilməsi qarşı tərəfin iradəsindən asılıdır. Konvensiyanı imzalamaq onların üzərinə bu məsələnin müsbət həll olunması öhdəliyini qoymur. Biz bütün imkanlardan istifadə edəcəyik ki, cavab müsbət olsun".
Qeyd edək ki, Azərbaycanla Macarıstan arasında hüquqi yardım haqqında müqavilə olmadığı üçün məlum məsələ bu sahədə hər iki dövlətin tərəfdar çıxdığı Avropa Konvensiyasına uyğun həyata keçiriləcək.