Azərbaycan, Bakı/ Trend müxbir E.Hüseynli/ Sabah axşam qərb rayonlarından başlayaraq Azərbaycan ərazisində hava şəraiti qeyri-sabit keçəcək, arabir yağış yağacaq, dağlıq və dağətəyi rayonlarda sulu qar yağacaq, qara keçəcək. Bu barədə Ekologiya və Təbii Sərvətlər Nazirliyinin (ETSN) Milli Hidrometeoroloji Departamenti hidrometeoroloji proqnozlar bürosunun direktoru Umayra Tağıyeva məlumat verib.
Tağıyeva bildirib ki, yağıntılar ayrı-ayrı günlərdə intensiv olacaq, arabir güclü şimal küləyi əsəcək. Abşeron yarımadasında havanın temperaturu gecə 2-5, gündüz 8-12, aran rayonlarında gecə 1-6, gündüz 10-14 dərəcə isti, dağlarda gecə 1-6 dərəcə şaxta, gündüz 2-7 dərəcə isti olacaq. Həftənin sonunadək temperaturlar 2-3 dərəcə enəcək.
