Azərbaycan, Bakı / Trend müxbir K.Zərbalıyeva/ Azərbaycan İşgəncələrə Qarşı Komitəsinin sədri Elçin Behbudov qadınların cəza çəkdiyi 4 saylı cəzaçəkmə müəssisəsində monitorinq keçirib. Behbudov bildirib ki, müəssisədə 254 qadın məhkum cəza çəkir. Onlarda 4-ü körpə uşaqlı analardır. Məhkumların saxlanma şəraiti, qidaların keyfiyyəti, dərman təchizatı qənaətbəxş qiymətləndirilib. 4 saylı cəzaçəkmə müəssisəsinin yerləşdiyi bina köhnə olduğundan məhkumların saxlanma şəraitinin yaxşılaşdırılması, Avropa standartlarına uyğunlaşdırılması problemlər yaradır. E. Behbudov bu müəssisənin yaxın gələcəkdə başqa əraziyə köçürüləcəyini və yeni, Avropa standartları səviyyəsində bina ilə təmin olunacağını bildirib.
Qadın məhkumlar saxlanma şəraitindən, işgəncə faktlarından şikayətçi olmayıblar. Onların əsas narazılığı məhkəmələrin qadınlara qarşı ədalətsiz və həddən artıq ağır cəza çıxarması ilə bağlı olub.
Müəssisədə saxlanılan qadınlar əsasən qəsdən adamöldürmə, dələduzluq və narkotik vasitələrin qanunsuz dövriyyəsi cinayətlərinə görə məhkum olunanlardır.