Azərbaycan, Bakı / Trend müxbir S.İlhamqızı/ Azərbaycanın Sankt-Peterburq şəhərindəki Baş Konsulu Qüdsi Osmanov martın 15-də Rusiya Milli Kitabxanasının direktoru V.Zaytsev və beynəlxalq əlaqələr şöbəsinin müdiri A.Asvaturovla görüş keçirib. Bu barədə Azərbaycanın Sankt-Peterburqdakı Baş Konsulluğundan məlumat verilib.
Görüşdə Sankt-Peterburq Milli Kitabxanası ilə Azərbaycan Dövlət Kitabxanası arasında əməkdaşlıq üzrə saziş bağlanması, həmçinin Sankt-Peterburq Kitabxanasında Azərbaycan nəşrləri bölməsinin açılması məsələləri müzakirə olunub.
V.Zaytsev bildirib ki, SSRİ dağıldıqdan sonra, 1991-ci ildən etibarən Rusiya Milli Kitabxanasına rəsmi şəkildə Azərbaycan nəşrləri daxil olmayıb. Həmçinin gömrük sahəsindəki probemlər də ölkələr arasında kitab mübadiləsinə əngəllər törədib. Görüş zamanı baş konsul kitabxanaya Azərbaycanın eks-prezidenti Heydər Əliyevin həyatı haqqında, müasir Azərbaycanın ictimai həyatına dair, Xocalı soyqırımı barədə və dahi şair Nizami Gəncəvinin Ukrayna dilinə tərcümə olunmuş silsilə şerlər kitabını hədiyyə edib.