Azərbaycan, Salyan / Trend müxbir E.Məmmədov/ Araz çayında baş verən daşqınlar, intensiv yağışların yağması və qarın əriməsi Kür çayının Azərbaycan hissəsinin aşağı axarlarında suyun səviyyəsinin kəskin qalxmasına səbəb olub. Trend in Salyan müxbirinin çərşənbə axşamı verdiyi məlumata görə, artıq Salyan və Neftçalanın sahilə bitişik yaşayış məntəqələrində həyətlərin yenidən kütləvi şəkildə qrunt sularının altında qalması təhlükəsi yaranıb.
Hazırda Kürün Sabirabad rayonundan keçən hissəsində saniyədə 1300 kubmetr, Salyanda 950 kubmetr su keçir. Təhlükəni nəzərə alan Fövqəladə Hallar Nazirliyi dünən Salyan rayonuna 21 nəfərlik şəxsi heyət, 15 ağır texnika, o cümlədən güclü su vurma qabiliyyətinə malik dörd nasos gətirib.
Kür-Araz çaylarında Bəndlərin İstismarı İdarəsindən çərşənbə axşamı bildiriblər ki, Salyanın daşqına məruz qalan təhlükəli ərazisi olan Babacanlı yaşayış massivində bənd möhkəmlənmə işləri aparılır.
2005-ci ildə Kürün səviyyəsinin artması nəticəsində Salyanda bir çox evlər suyun altında qalmışdı. Kürün 7 kilometri Salyan rayon mərkəzindən keçir.
Salyan paytaxt Bakıdan 115 kilometr cənubda yerləşir.
