...

Bakının BMX Treki DÇ-2018 üçün yenidən qurulur (FOTO)

İdman Materials 12 İyul 2017 11:16 (UTC +04:00)
Azərbaycan Velosiped İdmanı Federasiyası 2018-ci ilin iyununda Bakıda təşkil olunacaq BMX üzrə dünya çempionatının hazırlıqlarına başlayıb.
Bakının BMX Treki DÇ-2018 üçün yenidən qurulur (FOTO)

Bakı. Trend:

Azərbaycan Velosiped İdmanı Federasiyası 2018-ci ilin iyununda Bakıda təşkil olunacaq BMX üzrə dünya çempionatının hazırlıqlarına başlayıb.

Federasiyadan Trend-ə verilən məlumata görə, işlərə yarışın keçiriləcəyi BMX trekində yenidənqurma prosesi ilə start verilib.

Beynəlxalq Velosipedçilər İttifaqı 2018-ci ildən etibarən BMX idmanı üzrə dünya çempionatını yeni standartlara uyğun yarış trasında təşkil edəcək, yəni Bakı-2018 dünya çempionatları tarixində bir ilkə imza atacaq. Bununla əlaqədar olaraq beynəlxalq federasiyanın tövsiyyələri əsasında Bakı BMX Trekinin marşrutunda bir sıra dəyişikliklər edilib.

İlkin olaraq trekin marşrutunun eni, uzunluğu və döngələrin hündürlüyü yeni standartlara uyğun olaraq artırılıb. Maneələrin sayında da artım var və bütün bunlar marşrutun peşəkar idmançılar üçün daha çətin və eyni zamanda daha ekstremal olması anlamına gəlir. Yenilənmə prosesinə Beynəlxalq Velosipedçilər İttifaqının BMX idmanı üzrə mütəxəssisləri nəzarət edib və görülən işlərin keyfiyyətini, həmçinin marşrutun durumunu yoxlamaq üçün Avropadan tanınmış velosipedçilər, o cümlədən 2 qat Avropa çempionu, latviyalı Edzus Treymanes Bakıya dəvət edilib.

2 il əvvəl Bakı-2015 ilk Avropa Oyunlarının da iştirakçısı olan bu idmançı yarış marşrutundakı dəyişilikləri belə xarakterizə edir: "Buradakı test yürüşlərimiz bizdə belə bir təəssürat oyatdı ki, yeni marşrut daha həyəcanlı yarış keçməsinə zəmin yaradacaq. Düzdür, biz bu il təşkil olunacaq bütün yarışlarda köhnə marşrutla yarışacağıq, amma mən gələn il bizi sözün yaxşı mənasında nəyin gözlədiyini yaxşı bilirəm. Bu ayın sonunda ABŞ-da keçiriləcək dünya çempionatında digər ölkə iştirakçılarına da yeni marşrut haqda məlumat verəcəyəm. Çünki, dəyişikliklər həqiqətən də cəlbedicidir və düşünürəm ki, yarış trası tam hazır vəziyyətdədir".

Qeyd edək ki, velosiped idmanının ən gənc növü olan BMX 2008-ci ildən etibarən Yay Olimpiya Oyunlarının proqramına salınıb və hazırda planetin ən populyar idman növləri sırasında yer alır. İyulun sonlarında ABŞ-da təşkil olunacaq 2017-ci il dünya çempionatında Azərbaycan nümayəndə heyətinin xüsusi təqdimatla çıxışı da olacaq və gələnilki dünya çempionatının estafeti qəbul ediləcək.

Məqalədə:
Xəbər lenti

Xəbər lenti