Sablya üzrə milli komandanın üzvü Dünya Kubokunda bürünc medal qazanıb (FOTO)

Bakı. Tural Turan - Trend:

Sablya üzrə milli komandamızın üzvü Cavanşir Ağakişiyev İran İslam Respublikasının paytaxtı Tehranda keçirilən gənclər arasında Dünya Kubokunda bürünc medal qazanıb.

Trend-in məlumatına görə, qrupda keçirdiyi 6 görüşdən 4-nü qalib başa vuran sablyaçı 1/16 finalda Qazaxıstan təmsilçisi Bakdaulet Kuralbekulini 15:11 hesabı ilə məğlub edib. 1/8 finalda türkiyəli Umut Kaya üzərində 15:9 hesablı qələbə qazanan sablyaçımız, 1/4 finalda Honkonq idmançısı ilə görüşdən qalib ayrılıb. Ağakişiyev rəqibini 15:14 hesabı ilə üstəliyib. Yarımfinala yüksəlməklə Dünya Kubokunun bürünc medalını təmin edən qılıncoynadanımız belaruslu Maksim Pinçukla gərgin keçən görüşdə rəqibinə 13:15 hesabı ilə uduzub. Beləliklə, sablyaçımız Tehranda keçirilən gənc sablyaçıların Dünya Kubokunda bürünc medala sahib çıxıb.