Azərbaycan, Bakı / Trend müxbir İ.Xəlilova / Bazar ertəsi Azərbaycanın iqtisadi inkişaf naziri Heydər Babayevin verdiyi məlumata görə, Cənubi Koreyanın STX şirkəti Azərbaycanda gəmiqayırma zavodunun tikintisi layihəsinin texniki -iqtisadi əsaslandırılmasının hazırlıq prosesini başa çatdırır ki, bundan sonra da, yaxın iki ay ərzində layihənin təqdimatı baş tutacaq. Zavod yeni beynəlxalq ticarət dəniz limanı kimi Ələtdə tikiləcək.
"Biz bu gün Koreyanın Azərbaycandakı səfirliyinə, təqdimat prosesini sürətləndirmək xahişi ilə müraciət etdik, belə ki, limanın tikintisinin təqdimatı artıq sentyabr ayında baş tutub. Bu səbəbdən də yaxın zamanlarda gəmiqayırma zavodu ilə bağlı məsələnin aydınlaşdırılması yaxşı olardı" - deyə nazir bildirib.
Bununla belə, nazir hesab edir ki, TİƏ-nin işlənib hazırlanması işinə təzyiq göstərmək düzgün deyil, belə ki, nəticələr gələcək fəaliyyət üçün əsas rol oynayacaq.
Layihənin birgə maliyyələşdirilməsi ilə bağlı niyyət memorandumu Azərbaycan İnvestisiya Şirkəti və STX arasında 2007-ci il aprelin 24-də Seulda imzalanıb. Koreya holdinqi əsas səhmdar qismində çıxış edəcək, AİŞ isə iştirakın 25%-ni əldə etməyi planlaşdırır.
Gəmiqayırma zavodu Azərbaycanın Qaradağ rayonunda yeni neft terminalının və limanın tikintisi layihəsinə əlavə olacaq. Bu terminal vasitəsilə Qazaxıstan nefti nəql olunacaq. Qazaxıstan tankerləri, o cümlədən, digər Xəzər dənizi ölkələrinin gəmiləri burada yerləşən gəmiqayırma zavodunda təmir oluna bilərlər. Müəssisənin analoqunun regionda mövcud olmayacağı ehtimal olunur. Gəmiqayırma ilə bağlı sifarişlər həm ölkə daxilindən, həm də xaricdən qəbul olunacaq.
