Azərbaycan, Bakı / Trend müxbir Ü.İsmayılova/ "Thames Insurance Group" sığorta şirkəti "Lloyd's" sindikatına daxil olan təkrar sığorta şirkətində tikinti risklərini təkrar sığorta edəcək, çərşənbə günü şirkətdən verilən məlumatda deyilir.
"Lloyd's" sığorta şirkətlər arasında ödəniş faizlərini bölüşdürməklə öhdəsinə ən iri riskləri götürmək iqtidarında olan bazar kimi məşhurdur. "Lloyd's"un anderrayterləri tərəfindən sığortalanan ən iri risk 3,7 mlrd. dollar təşkil edib.
Şirkətdən verilən məlumata görə, "Thames Insurance Group" və "Lloyd's" sindikatına daxil olan təkrar sığorta şirkəti arasında Azərbaycanda tikinti risklərinin yenidən sığortasına dair müqavilə imzalanıb.
"Thames Insurance Group"un təklifi ilə "Lloyd's" sindikatının anderrayterlərindən biri Azərbaycana səfər edib. Anderrayterlər tikinti şirkətlərinin nümayəndələri ilə görüşlər keçirib, Azərbaycanın tikinti sektoru və tikinti materialları bazarı ilə tanış olublar.
Şirkətdən tikinti risklərinin sığortası barədə məlumat verilməyib.
1996-cı illdən fəaliyyət göstərən "Thames Insurance Group" İngiltərə-Azərbaycan birgə müəssisəsidir və hər iki ölkədə səhmdarlara malikdir.