Azərbaycan, Bakı / Trend , müxbir İ.Xəlilova / Azərbaycanın Dövlət Əmlakının İdarə Edilməsi üzrə Dövlət Komitəsindən verilən məlumata görə, Komitə "Azermetbuatyayimi" ASC-nin səhmlərinin 99,95%-ni investisiya müsabiqəsinə çıxarıb. Müsabiqəyə işçi kolektivin üzvlərinə güzəştli qiymətlərlə satılmış 14,95% səhm də çıxarılıb (kollektivə səhmlərin 15%- düşür).
Müsabiqə təkliflərinin qiymətləndirilməsi 2008-ci il yanvarın 9-da keçiriləcək, yanvarın 7-nə kimi namizədlər özəlləşdirmə planı ilə tanış ola və iştirak etmə barədə ərizələrini təqdim edə bilərlər.
Namizədlər təkliflər paketində çap məhsullarırın müasir standartlara uyğun olaraq yayımının keyfiyyətinin artırılmasını nəzərdə tutan investisiya proqramı təqdim etməlidirlər. ASC-nin inzibati binasının tikintisi, müəssisənin şəhər və rayon şöbələrinin təmiri, qəzet köşklərinin yeni və müasirləri ilə əvəz olunması, mövcud nəqliyyat vasitələrinin təmiri və yenilərinin alınması, yeni iş yerlərinin yaradılması və işçilərin sosial təminatına qoyulacaq investisiyaların həcmi və tarixi göstərilməlidir.
Təkliflərə dövlət büdcəsinə 230 min manat vəsaitin daxil edilməsi və ödəniş kimi komitəyə 10 min özəlləşdirmə çeklərinin verilməsi də daxil olmalıdır. Niyyətləritnin ciddi olmasını təsdiq etmək üçün namizədlər istənilən bankdan 70 min manat məbləğində təminat məktubu almalıdırlar.
2007-ci il noyabrın 1-nə olan məlumata görə, müəssisənin Nizamnamə kapitalı 345,3 min manat təşkil edir. Müəssisə istismara 1933-ci ildə verilib və heyəti 93 nəfər səviyyəsində formalaşdırılıb. SC-nin öhdəlikləri 439,8 min manat, əməkhaqqı və ona bərabər borclara görə öhdəlikləri sə 11,5 min manat təşkil edir. Müəssisənin debitor borcu isə 457,5 min manatdır.
