Azərbaycan, Bakı/ Trend İ.Xəlilova/ Azərbaycan prezidenti tərəfindən təsdiqlənən "2008-ci il üçün dövlət büdcəsi haqqında" Qanunda xarici borclanma limiti 2.4 mlrd. dollar səviyyəsində müəyyənləşdirilib. Bu il xarici borclanma limiti 1.2 mlrd. manat təşkil edib. Daxili dövlət borclanmasının yuxarı həddi 500 mln. manat həcmində nəzrədə tutulub. 2007-ci ildə bu rəqəm 300 mln. manat olub. Daxili borc dövlət qısamüddətli istiqrazlarının yerləşdirilməsinin həcminin genişləndirilməsi planları ilə əlaqədardır. Bu, antiinflyasiya tədbirlərindən biridir. Xarici borclanma həcminin ikiqat artırılması avrobondların yerləşdirilməsi planları ilə bağlıdır. Maliyyə naziri Samir Şərifovun sözlərinə görə avrobondların emissiyalarının həcmi əvvəl təklif olunan 300 mln. dollardan 500 mln. dollaradək artırıla bilər. Bundan əlavə, Avropa banklarından Əli Bayramlı DRES-in yenidən qurulmasına 600-700 mln. dollar xarici kreditin cəlb edilməsi planlaşdırılır. Avtomobil yollarının tikintisi üçün 300-400 mln. dollar kreditin cəlb edilməsi mümkündür. Su təminatı sisteminin yaxşılaşdırılması üçün Yaponiyanın Beynəlxalq Əməkdaşlıq Bankından (JBİC) 260 mln. , DB-dan 230 mln. dollar, ticarət və nəqliyyata yardım üçün (300 mln. dollar) kreditlərin cəlb edilməsi ehtimal edilir. Dünya Bankından təxminən 130 mln. dollar güzəştli kreditin cəlb edilməsi mümkündür. Əlavə maliyyələşdirməni Abşeron yarımadasında ekoloji problemlərin həllinə və əsasən yol tikintisi layihələrinə cəlb etmək mümkündür. Bu, hər biri 100 mln. dollar olmaqla ən böyük layihələrdir. Lakin kreditlərin kiçik həcmdə cəlb edilməsi gözlənilir. 2005-ci ilədək xarici borclanma limiti 200 mln. dollar ölçüsündə müəyyən edilib. 2006-cı ildə irimiqyaslı layihələrin həyata keçirilməsi üçün bu limit əvvəlcə iki dəfə, büdcə proqnozlarına yenidən baxış keçirildikdən sonra isə 3 dəfə artırılıb və nəticədə 1.2 mlrd. dollar təşkil edib.
...